Tennis Inelna lian, Grand Slam pali zinga upa leh ngaihhlut hlawh ber; Wimbledon chu khelh chhunzawm zel a ni a. Nilai zan khan champion lai Djokovic chuan awlsam takin hnehna a chang a, third round a inhlangkai. Awlsam taka Djokovic a chak lai hian a thlengtu aiawh a nih vanga ngaihven hlawh tak Andy Murray a tla ve thung a. French Open finalist Casper Ruud pawh second round paltlang zo lovin a tla ve bawk.Djokovic a chak nuamsa
Wimbledon-ah vawiruk champion tawh a, vawithum champion zawn tawh Novak Djokovic chuan Nilai zan khan Centre Court-ah Thanasi Kokkinakis a hmachhawn a, harsatna tawk lovin, nuamsak takin a chak.
Vawili champion zawn tuma hma lam pan mek Serb hian tha chungchuang takin bul a tan a, set khatnaah game khat chiah hlohin awlsam takin set a la phawt. Set hnihnaah a khingpui rawn khel tha hret mahse break a neih chhawr tangkaiin set a la zui leh tho thung. Set thumnaah khawm zawkin a inlan zui leh a, game thum chiah hlohin set a la nawn leh a, 6-1 6-4 6-2 a chakin third round a inhlangkai. Grand Slam-ah vawi 20 champion zawn tawh Djokovic hian third round-ah a hnampui Miomir Kecmanovic a hmachhawn zui leh ang.Murray a tla
Wimbledon-ah vawihnih champion a, Grand Slam-ah vawinga ngawt champion tawh Andy Murray chu hliamin a tibuai nasa hle a, a nih tur ang a ni phak lo viau tawh. Murray hian hun rei tak inelna a hmachhawn loh hnuin an rama inelna ngaihhlut hlawh Wimbledon a hmachhawn ve leh thei ta a. Beiseina sang tak nen inlan bawk mahse second round a paltlang zo ta chuang lo thung a, a khingpui John Isner hneh lovin a tlawm.
British mipui tan rawn Murray hian a khingpui palian zet mai John Isner lakah bul tan tha thawkhat viau mahse a serve a hum zawh loh vangin set khatnaah game li bak a la thei lo. Set hnihnaa Murray a khel tha hret a, game an inlak chhawk zak zak hnuin tie-break khelh a ngai. Tie-break-ah Murray a hnufual zui leh a, set hnih a hloh zawn. Set hnih a hloh zawn hnuin huaisen takin a khingpui a bei let a, set thumna hmuhnawm leh rei zet maiah Murray chungnung zawkah a tang a, tie-break-ah chungnung zawkin Murray hian set a la ve teh mial.
Set khat a lak vangin amah leh Centre Court-a amah tantute phurh hman viau mahse set linaah Murray hian a serve a hum theih loh vangin set a hloh zui leh a. Ft 7 dawna sanga John Isner lakah 6-4 7-6 (7-4) 6-7 (3-7) 6-4 a tlawmin second round a paltlang zo lova, Wimbledon 2022 zing kawng a zawh tawp. British mipuite tan rawn Andy Murray a hneh tum hian Isner hian Aces vawi 36 teh reng a nei tling hem mai a. A serve nat chhawr tangkaiin a hnehna a chang niin a ngaih theih Isner hian third round-ah kum 20 mi Jannik Sinner a hmachhawn zui leh ang.
Andy Murray a tlak rual hian champion tura rinkai zinga mi Third seed Casper Ruud pawh a chak zo lova, third round lut zo lovin a tla ve bawk.
French Open 2022 finalist Casper Ruud hian Frenchman Ugo Humbert a hmachhawn a, beiseiawm takin bul tan bawk mahse a ding chang zo lova, set khat a lak hnuin set thum a hloh zawn a, tlawm zawkah a tang. Ruud hian set khatnaah game thum chiah hlohin set a la a. Third round lut turin beiseina sang tak a nei hman. Bul tan tha viau mahse set hnihnaah beisei phak lovin, a che nawi viau a, game hnih chiah la in set a hloh chiang hle. Set thumnaah an inkhel tawk ta viau thung a. Game an inlak chhawk zak zak. Game an inlak chhawk zak zak vangin tie-break khelh a ngai hman tep a, hun pawimawh takah Humbert hian break a neih chhawr tangkaiin set a la zui leh. Set hnih a hloh zawn hnuin chak let tum viau mahse a serve a hum zawh loh a tuar a. Grand Slam-ah chet that zawn a tumna chu a thamral a, 3-6 6-2 7-5 6-4 a Humbert ngam lovin a puanthuah a tel ta a ni.
Nilai zana inkhel dangah rawlthar ngaihven hlawh ‘ Nadal thar’ tia hial an sawi Carlos Alcaraz chuan Tallon Grieks-poor chu 6-4 7-6 (7-0) 6-3 in a hneh a, third round a lut.