MLA, L Thangmawia’n Zoramthanga kaihhruai MNF sorkarin opposition bial nih vanga hrek lam aiin ruling bial nena ang khat renga a enkawl thin zia a lang chho zel niin a sawi a. “Hei hi ram hmangaihtu tih dan tur dik tak a ni”, a ti.
L Thangmawia chuan nimin khan Kawrthah khuaah Remna Ni hmanpuiin he thu hi a sawi a. MNF sorkarin eptu party MLA bial Hachhek biala Kawrthah khua town-a a puan hnuah he bial ami tho Kawrtethawveng pawh BDO thuthmun tura tihfel a nih thu sawiin, MNF sorkarin eptu MLA bial te pawh rorellai MLA te bial ang thovin ang khat vekin a enkawl niin a sawi.
Remna chu chapona tlang atanga neih theih a ni loh thu L Thangmawia chuan sawiin, "thuhnuairawlhna leh inngaihtlawmna atang chauha chhuak thin a ni" a ti a. "Zalenna suala lu chhum ban chhum huama chhuak hnam pasalthate inngaihtlawmna leh Mizo hnam an hmangaihna rah liau liau a ni" a ti.
Kohhran leh tlawmngai pawlte chu remna a awm theihna tura nasa taka beitu an nih thu sawiin, an ni pawh Remna Ni ah an lawm thar leh ngeia a rin thu L Thangmawia chuan a sawi bawk.