AIZAWL: Darlawn RD block huamchhunga MzSRLM, RD Department hnuaia Self help group (SHG) te tan School Education Minister Lalchhandama Ralte-in Custom hiring centre (CHC) bungrua a hlan.
School Education Minister chuan SHG chu thingtlang hmeichhiate dawmkanna scheme tha tak a nih thu sawiin, SHG kaltlanga thingtlanga retheihna umbo chu MzSRLM thil tum lian tak a nih thu a sawi a. Hmeichhia ten an hnathawh awlsam zawkna atana CHC bungrua chu pek an nih thu a sawi.
Lalchhandama Ralte chuan sorkar programme thenkhat chu a rah hmuh tur awm lovin a zuih ral fo tih sawiin, SHG te hmalakna erawh chu an dehchhuah hmuh tur a awm tak fo avanga lawmawm a tih thu a sawi a. Sorkar policy hlawkpuitute chu midangte tana entawntlak ni tur leh an hnathawhte a hmuna entlak ni turin a fuih bawk.
Darlawn BDO Lalfakawma Chhakchhuak-in MzSRLM-in thingtlang hmeichhiate tan SHG dinin, a hlawkna chu SHG member mai ni lovin khawtlangin an tel thin niin a sawi a. Sorkarin SHG te hnenah fund tam tak a pe mek tih sawiin, fund an dawn te chu tangkai taka hmanga, an khuaa SHG intelkhawm pawl Village Organisation (V.O)-ah an rulh leh thin thu a sawi.
Block Mission Manager, MzSRLM, Darlawn Lalduhawmi report-a a lan danin, Darlawn RD block huamchhungah SHG 318 din a ni tawh a, SHG member 2583 awm mekin, khaw tinah Village Organisation din a nih tawh a. CHC bungraw leina tur atan V.O te hnenah Rs nuai 2.2 theuh pek an ni a, SHG member ten an bungraw mamawh ang te an report hnu ah he sum hmang hian lei a ni a. Bungruate chu man chawiin anmahni khua ten an hawh thei a, chumi atanga an pawisa hmuhchhuah chu V.O te hnenah thehluh thin tur a ni bawk.
Bungraw hrang hrang - Combine Rice Mill (5 HP), Turmeric Grinding Machine (15k- gs), Power sprayer (20 (lts), Brush cutter (2 stroke), Brush cutter (4 stroke), Sprayer (2 in 1), Sprayer (16 (lts) te Vaitin, E. Phaileng leh Saw- leng Village Organisation-te hnenah hlan a ni.