Health Minister Dr R Lalthangliana hovin sorkar official-ten nimin khan SAD Conference Hall, MINECO-ah Mizoram a Covid-19 dinhmun an thlir ho a, tun hnaia Mizorama a kai an pung chak thar leh chu ngaihthah chi a ni lo tiin, mipuite fimkhur thar leh turin an ngen.
He thutkhawmah hian health department hotute chuan hun kal tawha Covid-19 hluar dan an zirchiannaah India ram hmunpui lamah hri kai an pun nasat atanga chhuta thla khat leh thla hnih inkarah Mizoramah an dinhmun ang a thleng ve ziah thin tih sawiin, tunah hian India ram hmunpui lamah hri leng a hluar nasat leh tan mek avangin lo inven lawk a tul hle tih an sawi.
Mipui puipunna hmun - mitthi in, Pathian biak inkhawmna, zirna in leh vantlang huap mipui intawhkhawmna hmunahte mask vuah leh mi dang hlata awm a tul thar leh hle tih thutkhawmah hian tar lan a ni a, CAB zawm a pawimawhzia inzirtir thar leh turin kohhran hrang hrangte leh tlawmngai pawlte ngen an rel bawk.
Covid-19 kai nia inringhlelte chu a rang thei ang bera sample test a pawimawh thu sawiin, he hri vanga nunna chânte zingah in-test tlai, an nat fe hnua in-test chauh an awm thin tih tar lan niin, mahni inringhlel chuan natna a lan chhuah hma ngeia in-test turin an ngen.
Sorkar hotute thukhawmah hian Covid-19 vaccine lak a pawimawh thu mipuiten hre thar leh se an duh thu tar lan a ni bawk a, a bik takin precautionary dose lak hun tawhte leh 2nd dose lak hun tawhten lak ngei ngei a tul thu tar lan niin, vaccine la duhten district tina Chief Medical Officer (CMO)-te hnenah vaccine lakna hmun leh hun a zawh fiah theih thu tar lan a ni bawk.
Covid-19 dona kawngah hmanraw pawimawh chi hrang hrang – test kit, PPE kit leh a dangah hlauhthawn tur a awm loh thu thutkhawmah hian health department hotuten an tar lang a, thawktute dinhmunte leh hmalakna tur chi hrang hrangte thlirho a ni bawk.
Thutkhawm kaihruaitu, Health Minister Dr R. Lalthangliana chuan Mizoram chu hun eng emaw chen hri lakah a zalen tawh avangin mipui thla pawh a muang tawh hle tih a sawi a, “Tun hnaiah hri kai an pun thar leh avangin nunphung pangngai kan lo zawh rei tawh lai hian kan fimkhur hle a la ngai tih kan hriat tlan a pawimawh,” a ti.
Hri laka Mizoram dinhmun a chhiat thui viau hnua fimkhur thar leh ai chuan tun huna lo inven fimkhur lawk hian awmzia nasa takin a nei dawn a ni tih hre turin Mizoram mipui a ngen tih a sawi.
Integrated Disease Surveillance Programme (IDSP) report atanga a lan danin thla kalta June-ah khan Covid-19 kai mi 771 an awm a, hri kai hmuh chhuah tam ber ni chu June 8 kha niin mi 64 hmuh chhuah an ni.
May thla khan sample 9,343 test niin hri kai 839 (8.98%) hmuh a ni a, June thla khan sample test 7092 zingah positive 771 (10.87%) hmuh chhuah an ni a. June thla kar hnuhnung ber khan sample 1,743 test niin positive 301 (17.27%) hmuh chhuah an ni.