Remna Ni hi kan inremtawnna ni lo ni mawlh rawh se
Mizoram in remna leh muanna tluantling neiin, state puitling kan nih pawh kum sawm thum chuang kan lawm thei ta, kum sawm li a tling dawn ruai tawh. A lawmawm a, zalenna hi a hlu bawk tih kan hriat reng a tha awm e.
Kan remna leh muanna neih chhan chu engpawh lo nise, hlut a, zah tur kan ni a, innghirngho nan ni lo, induhsak leh inlawmpui tawn theuh tur zawk kan ni tih hi kan hriatreng a tha awm e.
Remna Ni a lo thlen apiang hian a sulsutu nih inchuhna leh thawk hnem bik nih inchuhna boruak a awm ve ziah ta mai hi a pawi a, a thawktute chu tupawh lo nise, kan ram tana kan thawh a, kan hlan thiam hi a tul hle thungin a hriat thin.
Mi pakhat thawh rah vang a ni lo a, remna leh muanna duh Mizoram mipuite beihna leh ram mipuite duhna a hlawhtling ta hi lawm a, kan ram tan tia kan hlan ngam mai hi a hun tawh hle.
Remna Ni hi kum dang zelah pawh mitin inremna ni lo ni se la, political party te tan pawh a thawk nasa bik inchuhna boruak awm lovin, kan ram tana beitu theuh kan ni tih inhriat tharna, insawisel tawnna ni ni lo turin hman i tum theuh zel ang u. Remna rah hmasawnna hmu zel tura hmalam kan pan pawh a duhawm hle.