Russia-in Ukraine a rûn chungchangah ram tam takin Moscow dem mah se India chuan a thian tha hi a dem zawngin engmah a la sawi lo va, Russia chet dan chu ‘special military operation’ tiin a sawisak.
Sawiselna leh demna thu la sawi lo mah se mi ram nihna leh an ram chin inzahsak a that thu a sawi a; Ukrainian khua, Bucha-a mi tam tak thahna thleng chu chhui a tul thu a lo sawi tawh.
United States leh khawthlang ramten Russian tuialhthei leh an thil lei loh tur tih thu tilian hle mah se India chuan tam tak a leisak a, a ram mamawhna a san vang niin a sawi.
Analytics firm Kpler chuan Indian firm-te chuan January leh February khan Russian tuialhthei thlitfim loh lak luh nei miah lo mah se tunah hian barrel maktaduai 60 dawn a la lut tawh niin a sawi.
Russia hi India-in tuialhthei a leisak tam ram a ni ngai lo va, kum 2021 chhunga ram dang atanga a lak luh zinga 2% chauh Russia ta a lei a ni a, hei hi barrel maktaduai 12 vel a ni.
Kpler chuan tunah chuan Russia hi India-in Iraq dawta tuialhthei a leisak tam ber ram a ni mek tih a sawi.
Indian firm-ten Russia-in tuialhthei a thawn chhuah ber, Urals crude an tih mai hi March, April, May leh June bakah July leh August thlaa a lak luh tur zawng zawng nen barrel maktaduai 66.5 chuang zet a tling dawn a ni.