Aizawl: Tun hnaia India Prime Minister Narendra Modi-a’n Maan Ki Baat-a a thu sawi bawhzuiin Larsap Hari Babu Kambhampati chuan Save Chite Lui Coordination Committee (SCLCC) hruaitute Raj Bhavan-ah a kawm a. Chite Lui tana hmalakna kal mekte leh hmachhawp hrang hrangte an sawi ho.
Kambhampati chuan Chite Luia bawlhhlawh lut tam ber, plastic atanga thilsiam (plastic wastes) tihtawpa hmalak a tul thu te, mipuiah inzirtirna bakah lui dungah a theihna hmun apiangah thingphun tam tura hmalak a tul thu te, garbage net hman a tul thu leh hun bi neia hnatlang neiha sikul zirlaiah environment chungchang inzirtirna uar lehzualin kalpui tha a tih thu a sawi.
He huna tar lan a nih danin Chite Luia bawlhhlawh lut zingah za zela 80 vel zet chu plastic atanga thil siam hman hnu (plastic wastes) a ni a. Aizawl khawpui hnawmhnawk, he luia lut zinga langsar ber chu ‘plastic hman hnu’ an ni. Chungte chu chhar khawm ni fo thin mah se, a thehthang zuina tur leh thehthang zui dan turah a tifaitute pawhin vawi duai lo harsatna an lo tawhte tar lan a ni.
Sorkar laipuia Ministry of Environment, Forest & Climate Change dan siam Plastic Waste Management Rules 2016 chuan plastic atanga thil siam hman hnute hi tawngpawng thehthang mai loin tangkai zawka hmanna dap tura a tih angin Chite Luia plastic hnawmhnawk atanga PWD te nena tangkawpa siam; Reiek Plastic Road thlirhona neih a ni bawk.