League phase hmang tha tak Mission Veng Hotshots in hnehna chang chungin Mizoram Super League 7 a league a an khelh tur an khel zova. Ningani zanah 86-72 in Chanmari Vikings an hneh.
Hotshots hian match 10 atangin point 17 an hmu a, Play in khel turin an tling chiang tawh a. League ah hmahruaitu an ni mek.
Vikings in beiseina an la nei a, Inrinni zanah an inkhel dawn. Chutihrualin nizana inkhel Tuikual South BC result-ah an innghat tel.
R.Dengthuama Indoor a inkhelah Hotshots in zan dang ang bawkin basketball hmuhnawm tak an khel a. An tha za leh chet ran te chu an hmuhnawmna a ni.
Mi pathumin point sawmhnih chuang an score a, Lalrozama’n 24 score in hma a hruai a. Joshua Aaron Keyes leh Eddie Zaithanmawia ten point 23 leh 21 an thawh.
Chanmari Vikings tan Moses Lalmuanzova chuan point 35 a score a. Rebound vawi 7 a la bawk.
Raymond Edward Miller Jr. chuan point 11 score in a dawt a, ani hian rebound vawi 8 a la.