Prime Minister Narendra Modi leh Russian President Vladimir Putin chuan Zirtawpni khan ei leh in hralhna lam leh khawvel puma energy dinhmun an sawi dun a; lo neihna kaihhnawih hmanrua, lei tihthatna leh damdawi lam siam chhuahnaa zau zawka thawhdunna turte pawh an sawi.
Telephone-a ram pahnih hruaitute inbiak hi Indian prime minister-in Germany-a G7 Summit a chhim hnu ni thum lekah niin ram lian pasarih hruaitute chuan an thutkhawmnaah hian Ukraine a rûn tihtawp nan na zawka Russia hrek dan tur an rel.
Modi-a leh Putin-a hian kum tina ram pahnih inbiakna neih thin hmanga president-in December thlaa India a tlawha an thil sawi hmalaknate an sawi dun.
“Lo neihna hmanrua te, lei tihthatna leh damdawi lam siamnaa thawhhona awm sa tihzauh dan turte an sawi,” tiin sorkar thuchhuahah tar lan a ni.
“Hruaitute hian khawvel huap thil dang, energy leh ei leh in lam te pawh an sawi,” an ti.
“Ukraine-a thil thleng mekah hian Prime Minister Modi-a chuan India-in a duh ber chu inbiakna neih leh palai tirh a ni,” tia tar lan a ni bawk.
Hruaitu pahnihte hian a khât tawka khawvel huap thil leh ram hnih inkar sawia inrawn thin ni se an ti bawk.
Tun tum hi ram pahnih hruaituten kumina phone-a an inbiak vawi lina a ni tawh.
Russia-in Ukraine a rûn tan ni, February 24 khan khan inbiain Putin-a hian Modi hnenah hian thil thleng mek a hrilh fiah a. March 2 leh March 7 khan inbe lehin hei hi India-in Ukraine-a a mi 20,000 chuang tangkhangte lak chhuah tuma hma a lak lai niin hemi chungchang hi an sawi.
An inbiak tawhnaah hian Modi-ah chuan a rang thei anga tharum thawhna titawp turin a ngen ziah a, khawi lam ve ve pawhin inbiak leh palai tira remna kawng zawh tum tura a duh thu a hrilh ziah a ni.
Russia leh NATO inkara inhriat thiam lohna awmte pawh ‘inzahtawn leh inbiakna tha tak neia chin fel’ theih a nih thu Modi-a hian a sawi bawk.
March 7-a Putin-a nena an inbiak tum khan Modi-a hian Ukrainian President Volodymyr Zelenskyy nena hmaichhana inbiak chu ‘muanna atana awmze nei ber tur’ a nih thu a lo hrilh tawh.