North Korea-a Covid hri darh chu South Korea nena an inrina bula an ram miten ‘khawvel pawn lam’ thil lo tla an tawh atangin an kai darh ta niin Pyongyang-a sorkar chanchinbu chuan a puang.
An ram mite chuan South lama thil eng emaw puak an thlirna atangin hri hi an kai tih an sawi.
Kum tam tak kal ta atang tawhin South lama mite hian balloon hmangin ramri kân hian leaflet leh puihna thilte an lo thawn lut tawh thin.
An thenawm ramin hri darh dan a sawi hi Seoul chuan chhangin, Covid darh phah nan ‘hetiang a theih loh’ niin an sawi.
North Korea-a sorkar chanchinbu chuan sorkarin a chhuinaah an rama Covid a darh chiam hma lawk khan mi pahnih chuan South Korean ramri-ah thil eng emaw an tawh atangin an kai tih hmuh a ni tih an tar lang.
April tla tir khan sipai kum 18 mi leh naupang kum nga miin hri hi an kai tih hmuh chhuah a ni a, heng mite hi Ipho-ri-a tlang pakhata thil eng emaw an khawih atangin an kai niin an sawi.
He mi hnuah hian, “Covid-19 chu DPRK (North Korea)-ah na takin a darh ta chiam a ni,” tiin an tar lang.
An chhuinaa an thil hmuh avang hian mipuite chu ‘thli leh khawvel pawn thil (alien thing), sik leh sa leh avang leh balloon hmanga ram inrina vela thil awmte khawih mai mai lo turin’ an ti tih tar lan a ni bawk.
Hetiang thil danglam deuh hmu apiang chuan a rang thei anga thuneitute hrilh tur leh emergency anti-epidemic team-in an buaipui zui tur thu an tar lang.
Sorkar chanchinbuin chhuina a puanah hian South Korea hming lam rik a ni lo va; mahse, Seoul-a unification ministry chuan North-in an rama Covid darh dan a sawi chu thil awihawm loh lutuk a nih thu a sawi.
Korea ram hnih inrina hi khawvela ramri venhimna khauh berna hmun a ni a; mahse, kân ru leh South Korean activist atanga balloon hmanga thil thawn lut an awm reng tho.