- F. Vanlalrochana
- REMNA NI: Tun ningani (30.06. 2022) khan Remna Ni puala hun hmangin Vana Pa hall-ah kan kal a. Thil pahnih ka hre chhuak a.
Pakhat chu, 73rd Mountain Division Command tu (GOC) Maj General SS Mishra sawi a ni a. “Mizoram hi is the model state of how to handle insurgents and preserve peace for all the NE states to follow” tih a ni a. Aizawl mawizia a sawi a, “Zemabawk atang ka han thlir a. Aizawl khawpui lo lang un mai chu ka han en a. Khawvelah a aia mawi hi ka la hmu lo hrim hrim. Min ring rawh u, Khawvel hmun mawi tak tak hi ka hmu hnem lutuk tawh” a ti thlawt mai.
Pakhat leh chu, hna Interview a zawhna min zawh kha a ni.
“Engatinge Mizoram hian remna muanawm tak a neih bik?” tih a ni a. “Hmasang atangin Mizo fate hi Indo hnam kan ni a. Chi leh chi, khua leh khua kan indo a…British ho nen pawh kan indo a. Inremna sa ui kan tan fo a. Mahse, Mizo fate hian kan thutiam kan bawhchhe ngai lo a. 1870 hnu lama British nena kan indona te pawh hi British hoin an thutiam an bawhchhiat vang a ni. Kan thutiama kan din ngheh vangin Inremna kan nei thei a ni. Thutiam hi bawhchhiat a nia kan hriat a, kan hnam himna hi a derthawnga kan hriat hlauh chuan, enge maw kawng zawng takin kan indo leh ang. Chumi hma erawh chuan, Remna leh muanna hnuaiah kan awm ang” ka ti a.
- NAGA PAHNIH:
India ramin hun thar a kai dawn khan Naga hnamte hian hruaitu mi fel tak pahnih an nei a, pakhat chu AZ Phizo a ni a. Pakhat chu Rishang Keishang a ni.
Anni pahnih hian ngaih dan hrang hlak an nei a…Phizo a ngaih dan chu, “I want an Independent Nagaland when a naga can feel that he is somebody and can be his own master. Life will then be worth living” tih a ni. Rishanga ngaihdan erawh chu,”I want each of them becomes a complete individual, able to transcend their limited tribal personality and live as a proud member of the great indian family” tih a ni. An ngaih dan chu eng pawh nise, naga hnam tan, an mite tana thil tha duh ve ve an ni. Rishanga hi Indian politician Hlun ber niin a la dam a, Phizoa chuan a beisei Naga Zalenna chu hmu loin a thi a, a beiseina a thihpui thung.
Tumkhat chu, Rishanga kha Phizo a te hian an man a, Rishang-a chuan , “Ka chungah ro in rel dawn chuan rel thuai ula, thutlukna siam fel thuai rawh” a ti a. Phizo-a chuan, “Kei chuan ro ka rel sak lo ang che…history in i chungah ro a la rel anga, thutlukna a la siam ang” tiin a sawi. Hemi hnu hian Phizo hian Rishanga te hi a kal tir a. Rishanga chuan an kal dawn hian, ” Lo kir leh la. Silai tel loin i thawk dun ang, Naga hnam tan” a ti a. Phizo a chuan, ” I cannot give up on my conviction” tiin a chhang a ni, an ti!
- THANMAWIA CHONGTHU : Captain Thanmawia Chongthu, MPS (Rtd) hi DIG rank kaiin a pension a. Sipaiah tang zel se Brigadier Thanmawia Chawngthu a ni ve mai dawn a nih chu. Pa rorum ve tak, pa ve beu beu tak mai kha a ni a, a hmel chauh en pawhin a nu zim zem lo tih a hriat.
Lunglei SDPO-a ka awm chhung khan mi a ngaina ve tlat mai a. Kan quarters-ah te khan a lo leng fo a. Ka fanu Abigaili pawh, “Miss India tur,” a ti thin.
Mizoram Police Service-a a luh hma hian Short service (Regular) Commission-ah 1968 khan a lut a, 23 June 1968 khan Indian Army-ah Commission Officer a ni. Mahni rama inbenbel a duh dawn avangin sipai Officer chu bansanin, January 1975 khan Mizoram Police Service a zawm ta a, chutih lai chuan DSP Exam an ti a, a batch hmasa ber zing a mi a ni. NPA, Hyderabad-ah Basic training 1976-ah hlawhtling takin a zo a, West Bengal (Jalpalgury) ah District Training-in a kal leh a, a training zawhah a posting hmasa ber SDPO Mamit-ah May thla tawp 1977-ah a zawm a, SDPO Mamit hmasa ber a ni. SDPO Lunglei-ah 1978-ah a awm a, 1980-ah SDPO Saiha-ah an dah leh a, vanneihthlak takin September 1983 khan SP-ah a kaisang a, Pu Hmingdailova Khiangte nen hian Addl. SP/Dy.co bawhkanin SP -ah an kaisang a, Sp. CID ah an post ta ni. Tichuan, District SP Lunglei, Commandant 2nd MAP Lunglei, Commandant 1st MAP Aizawl-ah te a awm hnuin 1997 khan AIG — I, PHQ -ah an post leh a, Mizoram Sawrkarin MPS Service rules siam tha-in DIG (A) post kha State Police Officer tan a dah a, Pu C. Khenglawta (RIP ) kha chu post -ah chuan chuan kaisantir a ni. Rei awm loin a pension ta a, IAS leh IPS hoin State Police Service ho DIG a awm kha an duh lo a, tichuan dah zawm lohin a awm ta a, Mizoram Sawrkarin DIG (A) post chu NonFunctional-ah dahin MPS Senior Administrative Grade-ah siamin kum 1999 khan (AIG – II a nih laiin) SAG -ah an dah taa. Tunlaia MPS Supertime Grade ~‘B’ kan tih tak hi a ni.
Mizo zinga short service Commission a lut hmasa ber a ni. Tunlaiah hmasa ber kan uar bawk a, sawi lang hrim hrim ila…
TIH DUH LOH NEI TLAT THIN THANMAWIA
Ni 8.8.2001 ah Fire Service Department a zawm khan thil eng emaw an Department hna pawn lam tih duh miah loh a nei thin a. Fur ruahtui bawhawkah hian veng thenkhat culvert bawlhhlawhin a lo hnawhphui a awm thin a, veng YMA -in Fire Tender a phuhfai an dil thin a, a tihsak duh ngai lo. Tin, Republic Day Lammuala parade kha a khu duh viau maia, parade dawn tlai leh parade ni zingah Fire Service, Department-in a khuk loh nan tui theh huh turin an ti thin a, chu pawh chu a duh ngai lo. Fire tender a tui, mual theh huh nan an hmang zo ang a, khawi lai vengah emaw in kang lo awm se a Department mualphona a ni. Khawi veng hmawr deuh a mi, eg. Thuampui ten Leipui/Lo an hal dawnin fire tender an venga dah phei turin min ti thin a, hei pawh hi a ti duh lo.A chhan chu kangmei chhuah hmasakna tur hriat lawk theih a ni lo. Veng hla taka fire tender va dah lai khân hmun dangah kangmei chhuak se, Department tan chhanna an nei lo ang. A dang leh deuh pawh tunhma deuh kha chuan ram hruaitu etc. ten Mo lawm etc. ah an ruai theh na tur ground a khuk loh nan fire tender a tui theh huh turin an ti thin a, hei pawh hi a ti duh lo.
RAMNGAW LAM…
Padma Shri dawn tir tumin theihtawp kan chhuah a. Reccommendation kan ziak a. New Delhi chu kan recommendation chuan thleng thla ve. Forestation lama hna thawk tha a ni a. A dawng teuh fu chuan ka ring. Kha kan thiltih avang khan ka chungah pawh a lawm thiam ve hle a ni. A dawng ta chiah lo na a, amah a liam ta nen, chawimawina dawn phu khawpin thingphun leh ramngaw humhalh kawngah chuan a thawk tha tih tarlanna atan ka han sawi chhuak ve a nih chu!
Tun hma pawhin minister leh hotu lian dang atang pawhin ramngaw humhalh leh thingphun lamah a thawh that avangin chawimawina pawh a dawng nual a. Amred Veng, Aizawl pawhin chawimawina an pein ka hria.
1st BN MAP Armed Veng, Aizawl leh 2nd BN MAP, Lungleiah te Thanmawia Chawngthu sulhnu hi a hmuh theih a, hetianga thing dingthelh ta sung te hi amah hriatrengna tur an ni ve tawh mai ang chu.
Rest well, Captain Sap.
(Ni 28.6.2022 khan Thanmawia Chongthu hi a thi a. Ama in Rahsi Veng, Lungleiah vui nghal a ni)
- LUNGPUI PHENA LAIKING (POETRY)
Lungpui phena laiking khawsa
In phennana lungpui hmang
Ni engmawia lungpui lera bawk
Thlipui kara lungpui phen a hmang.
Chhimbala zinga ropuina zawnga
arsi thlawk hmanga thlen hma tum
A kih hnawka buaia mi dang tang,
A tanga te thiam loh chan tir.
Fur a ral a. Thala lo lang a,
Lungpui phena laiking khawsa
thlasik a lo ni a, Nipui a lo lang a,
Lungpui chungah laiking chu a lo ding leh a.