Mizo professional boxer Vanlalawmpuia leh F Zoramchhana ten a vawi khat nan India ram pawnah professional bout an khel dawn a, Thailand-ah Thai boxer ve ve an bitum dawn.
Vawiin hian Bangkok a Spaceplus-ah The Fighter boxing inelna buatsaih a ni dawn a. Inhnek panga awm tur zingah Awpa'n super lightweight-ah Aekkawee Kaewmanee a hmachhawn ang a, super bamtamweight-ah Zotea leh Yutthana Kaensa te an intum ve thung ang.
India sanaah chhun dar 12:30 atangin show tan a ni dawn a, LPS pay-per-view atangin en theih a ni ang.
India super lightweight number one Awpa'n round ruk khelh zawh ngai lova chak ngei a tum tih a sawi a, professional a luhchilh atanga vawi li a inhnek tawhah tlawm nei lovin tum thum a chak.
A beih tur kum 40 mi Kaewmanee erawh vawi 40 inhnek tawhin tum 24 a chak a, vawi 16 tlawm tawhin a inhnek hnuhnun tum hnihah a tlawm zawn.
Zotea'n a inhnek tawha pawimawh em em leh a hma lam hun hril tur a ni tih a hre chiang a, professional huangah vawi thum inhnek tawhin a tir vawi hnih a chak zawn hnuah November 27 khan Aizawlah Sandeep Singh Bhatti lakah a tlawm.
Kawng hrang hrangah Kaensa nen khaikhinin rin a kai zo lo viau a, chuti chungin WBA Asia Flyweight champion ni tawh leh world title chuh tawh Kaensa hnuhma leh sulhnu te a ngaihtuah buai loh thu a sawi.
"Thai boxer pakhat, a hneh theih ngei tur nen an intawng dawn a, chutiang rilru pu chung chuan hruihrual chhungah ka lut dawn” tiin a sawi.
Kaensa hi vawi 21 chak tawhin tum thum a tlawm a, June tir kha a inhnek hnuhnun ber niin harsa lo takin a chak. Amaherawhchu, an khelh thina flyweight aia rit super bantam-a inhnek tur an nih avangin Cherhlun tlangvalin hamthatna neih phah a inbeisei.