Aizawl: Tlabung Branch YMA-in ‘The Mizoram Maintenance of Household Registers Bill, 2019’ chu dan puitlinga siam an phut.
Niangni zana YMA Tlabung Branch Kumpuan Sub-committee thukhawm chuan an chhehvela hnam dang pun chak dan chu rinhlelh loh harsa an tih thu leh tuna hmalak dan tur kawng an dap vat loh chuan an la tlai thuai tur thu an sawi a. Tlabunga cheng Mizo awmchhunte pawh hmun danga an pem chhuah fo thin chhan chu hmasawnnain a thlen mumal loh vang nia an ngaih thu leh, eng pawh sorkar sela ram leh hnam himna tur a ni tih hmu thiama tun aia Tlabung ngaihsak an duh thu an sawi.
Kum 2019 March 18-a Mizoram assembly thutkhawmnaa lo pass tawh, ‘The Mizoram Maintenance of Household Registers Bill, 2019’ chu hnam dang pung chak zel tur danna leh venna tur nia an hriat thu thutkhawmah hian sawi a ni a, dan puitlinga siam thuai an phut thu an sawi.
Tuna he bill thlen chin leh dan puitlinga siam a nih theihna tura bawhzui chin puangzar turin Mizoram sorkar an phut bawk a, hmalakna chawlhsan a nih pawhin tharthawh leh turin sorkar an ngen.
Hei bakah hian YMA Tlabung branch Kumpuan Sub-committee chuan tun aia chak zawka Mizo an pun theihna turin fa neih tam a pawimawhzia uar zawka inzirtir an rel a, an huam chhunga fa nei tamte hnenah YMA hminga chawimawina pek tha an tih thu an sawi bawk.