Aizawl: PHE department leh Central YMA buatsaihin Inrinni khan Aizawl, Lunglei leh Serchhip-ah te Tlawng lui fintu lui then fai hnatlangpui neih a ni.
Aizawlah chuan hnatlangpui vai liamna hun chu Vanapa Hall kawtah neih a ni a, hnatlanga thawk chhuak turte vailiamtu, Dy Chief Minister Tawnluia chuan Tlawng lui chu Lunglei, Zobawk dai atanga hnar nei, lui pawimawh tak a nih thu a sawi a, “Aizawl leh Lunglei district-ah phei chuan kan rin rawl, tui in tur min chawmtu kan ti thei hial a ni,” a ti.
Hnatlangpui koh a nih chhan sawiin, “Tlawng lui hian tui thianghlim zawk mipui tan hnianghnar taka a pek reng theihna tur leh lui tui tibawlhhlawhtu pui ber plastic atanga thilsiam chhuah hman tlem a tulzia mipuiten an hriat theih nan hnatlang koh a ni,” a ti a, lui then fai hnatlangpui chu koh zel pawh an la tum tih a sawi.
Tawnluia chuan PHE department engineer-ten ni tin Tlawng lui an teh a, record tha tak an nei tih sawiin, heng record atanga a lan danah thal laiin tui nghei hlauhthawn awm chang a awm thin tih sawiin, “Hei hian tuihna venhim bakah vawnhim leh humhim a tulzia a tar lang,” a ti.
Tui chu mihring tan mai ni lo, thil nung reng rengin an tlakchham chuan a thlakthlengtu pakhatmah a awm lo a, mihring nunna atana lo theih loha neih ngai a nih avangin, tui thianghlim neih nan leh tui a lo tlem loh nana tui hnar humhalh leh tihbawlhhlawh loh chu tum tak zet a ngai tih PHE changtu minister chuan a sawi a, lui hnar humhalh chu mi tin mawhphurhna a nih thu a sawi.
Coordination Secretary Er H. Duhkima kaihhruaia hun hmanah hian CYMA General Secretary Prof Lalnuntluanga leh Vice President Lalhmachhuana ten thu an sawi bawk a. Hnatlangpui an buatsaih hian Mizo mipuiah rah tha chhuah an thu te, an thil tih hian Zoram chhungah tui thianghlim neih belh zelna turin an chet chhuah a ngaihzia a tar lang tih sawiin, environment humhim kawngah CYMA chu a tlanchhe ngai dawn lo tih an sawi a ni.
Tlawng lui fintu lui leh kawr hrang hrang tifai hian branch YMA hrang hrang 106 atangin mi tlawmngaite an thawk chhuak a, PHE staff mi 200 chuang an thawk chhuak bawk a. Tlawng lui fintu Sakhisih Lui, Kulikawn; SAI thlang, Mission Vengthlang; Tlawng Road (Reiek); Vailui Hnar, Bungkawn; Tuikual Lui Fintu, Maubawk & MINECO inkar; Tuikual Lui, Ebenezer Hospital bul hnai; Tuikual Lui (Tuithum), Lawipu; Dinthar Lui, Ebenezer Hospital bul kawr; Hnimtheilo Lui, Chawnpui/Zonuam; Tuithum, Chawlhhmun; Sihhmui Kai te an thian fai a, Tlawng kamah thing 250 vel phun a ni.
Lungleiah chuan YMA Sub Hqrs. Lunglei leh PHE Department tangkawp buatsaihin Tlawng lui hnar, Zobawk atangin Lunglei dist huam chin then fai a ni a, hei bakah hian a fintu lui eng emaw zat chu mihringin an tihbawlhhlawh zualna laite thlangin thian fai.
Hnatlangah hian khawpui chhunga YMA branch 21 atang leh khawpui pawn YMA Group pali atanga branch 19, a vaiin YMA branch 40 atangin Tlawng lui leh a fintu lui then fai hnatlang hi hmun 12-ah neih niin PHE Dept thawktute bakah YMA member mi 1,000 chuang an thawk chhuak a ni.
Serchhip PHED Division, Serchhip Sub-Hqrs. YMA leh Vantawng Group YMA tangkawp buatsaihin khan Tlawng fintu Thenzawl khaw chhunga lui luang, ‘Lau’ lui then fai hnatlang neih a ni bawk a, a, he hunah hian Serchhip leh Thenzawla PHE department staff te, Serchhip Sub-Headquarters YMA Executive Committee member bakah, Vantawng Group YMA hnuaia YMA branch hrang hrang atangin mi thahnem tak an hnatlang a ni.