- Consumer pakhat hnen atang hian zir tur kan nei
- Lallunghnema, Charity Lodge
Ka article chhuak hnuhnung eng emaw zatah khan Mizoram pawn lam thil thleng ka rawn ziak hlawm a. Chung ka article-ah te chuan Medical Negligence avanga doctor thenkhatte leh ultrasound centre pawisa chawitir an nih thu ka tarlang a nih kha .Chhiartuten in lo tangkaipui ngei ka beisei. Mizoramah hian doctor thahnem tak kan nei a. Damdawi In pawh kan nei ve ta nual bawk. Damdawi In tha tak tak chhuanawm tak tak a awm bawk. Chutih rualin thingtlang lama kan Hospital neihte erawh chu an ropui lem lo khawp mai a. Thenkhat erawh man hla tak tak an ni tho mai. A pawimawh ber chu ‘service’ tha hi a ni a. Mihring tih damna hnathawktu hna hi a hlu em em a; a zahawm bawk tih hi mipuiin kan hriat a tul hle bawk a ni. Chapo leh chal tlai taka awm hi tihdamna hna thawktute mizia nen a inhmeh hlawl lo va. Tlem lai deuhva thingtlang khaw pakhata doctor chet dan rawva tak kan han hriat pawh khan mipui rilru a khawih hle a. A thil tih dan kha sawrkarin a lo hria a,chawlh lai lawktir(suspended) a ni nghal ta mai bawk. Doctor leh nurse te, tihdamna hna thawktute hi an zahawm rualin nep taka an khawsak a rem lova; Kristian zia a ni hek lo.Hawihhawm tak leh zaidam taka hna an thawh hi mipui beisei a ni a. An tih tur pawh a ni.Mipui pawh kan hawihhawm ve tur a ni bawk. Consumer Protection Act hian Medical Negligence hi a awm a remti lova, deficient service hi a awm tur a ni hek lo. He Act leh Rules hnuaiah hian mitin hian hna an thawk a ni. Gas Agent te, buhfai Retailer te, Dawrkai chitin leh thil zuar zawng zawngte leh service provider tinte hi Consumer Protection Act 2019, hian a phuar khawm vek a ni. He Act bawhchhiatna chu lung in tan thlengin hrem theih an nih thu ka sawi thin,kan han sawi leh hmasa a ni e.
Hetiang hian kan thupui hi kan sawi tan ang.A kipa kawiin kan sawi dawn love A sei lovang e.
Pu Lalramnghaka chuan Rs10,8000/- man hu damdawi bur(vial) 30 chu Seema Pharmacy Store, Hossain Shah Road Kiddarpore, Kolkata hnen atangin a chah a. 50℅ advance a pe in Nghaka nupui MRB account kal tlanga thawn a ni a. He damdawi man an thawn atanga chawlhkar khat liam hnu pawhin an damdawi chah chu an thawn thlen theih mai loh avangin complainant chuan he dawr neitu Abhishek hi a zu bia a. Bungraw rate an inhrilh sual a ni tih an lo sawi tlai khaw hnu a. Chu bakah chuan transportation cost atan Rs. 10000/- Nghaka hian a pek belh a ngaih thu an lo hrilh a. Hetiang a lo nih tak nuai avang hian complainant Nghaka chuan Seema Pharmacy neitute chu bur (vial) 10 chauh thawn mai turin a ti a. Transport cost pawh Canara Branch Bank Manager Account-ah an dahlut(deposit) nghal a.Chuti Chung pawh chuan,he sumdawng dawr neitute hian damdawi bur pakhat mah an thawn ta chuang lo va. Chuvangin damdawi man tura a pek leh transportation charge atana Bank kaltlanga a pek, a vaiin Rs. 640000/- pe kir (refund) turin a zu hrilh a. Mahse pawisa an pek kir(refund) theih loh avangin Consumer Commission,Aizawl District,Tuikhuahtlang hnenah thlenin Seema Pharmacy neitu hi a khing ta a ni.
An thubuai(complaint) ngaihthlak(hearing) neih tura hun ruatah pawh opposite party emaw an aiawhte an lan loh avangin Consumer Commission chuan complainant thu thehluh(complaint) chu ngaihtuahsakin thutlukna a siam ta a.Police te chu Canara Bank Manager Naresh Kumar account chu che thei lo tura hrensak turin thu pek a ni a. Rs. 64000/- chu complainant hnena ni 30 chhunga hlan tura hriattir an ni ta a ni. He Judgement Order-ah hian Aizawl District Consumer Commission President leh Member pahnihten an hming an ziah hnan a ni.
Hemi hnu hian Police thurawn angin Seema Pharmacy neitu Sema Abhishek a bank account atangin Rs. 54000/- leh Naresh Kumar Bank manager account atangin Rs. 10000/- hrensak tur tih a ni leh ta zawk a ni.
Tuna kan sawi hi dawrkai sumdawng ten an thutiam an hlen loh chungchang a ni a. Inbumna nasa tak a tling bawk. Chuvangin phai lama thil chahte hi fimkhur a tul hle a . Nghaka hian a thil tawn hi min hrilh a Consumer Court-ah huaisen takin a kalpui a. A fakawm hle a ni. Consumer Court-a ka awm lai pawh khan Mizo nula pakhat hian cheng tam tak man Gujarat state a dawrkai pakhat advance pein computer a chah a. Bungrua a hmu lova. A mangangin Consumer Forum(khang hun lai khan forum tih a ni) ah he sumdawng vaipa hi a khing a. He vaipa hi kan be pawp thei si lova; a mangan thlak hle a ni. Chhuak lehah chuan Airline Company pakhat Consumer Commission pakhat hremthu tarlan ka tum ang..
Hetiang thil thleng hi consumer te lo inzir vena atana ziak ka ni e. I thil lei leh hmanna a i lungawi loh chuan heng lama inhmangte hi pan thin ang che.
I thil lei apianga rawk leh buma i awm loh nan fimkhur thin ang che.