Aizawl : Khawzawl district Treasury office thar chu Zirtawpni khan Pathian hnenah hlanin, luahluh a ni a, Deputy Chief Minister, bialtu MLA Tawnluia hovin pisa thar hi an luahlut a ni.
Dy. CM Tawnluia chuan Khawzawla Treasury office hanthawh bultan a ni ta chu lawmawm a tih thu a sawi a. Khawzawl District Treasury office thar chu Remna Ni-a luah hman tum ni mahse, inpeih hman a nih loh avangin July ni 1 atanga hna tan tura ruahmanna siam a nih thu a sawi.
Treasury Office atan hian Khawzawl Vengthara WC Thandawla in chu luah a ni a. Treasury Officer hovin, AO, AAO, LDC leh fourth grade ten bul an tan a ni.
Khawzawl dist Treasury office Pathian hnena hlan inkhawm hi Dist Treasury officer Lalchhuanliana Sailo-in a kaihruai a, Dist Bawrhsap CC. Lalchhuangkima bakah Khawzawl khawpui chhunga sorkar department hrang hrang aiawhte an tel bawk.