Tlawng lui thenfai beihpui thlak zel ila
Nimin maiah kan khawpui tui tlan ber Tlawng lui tawp lutuk thenfai hnatlangpui kan huaihawt a. Thawkchhuak pawh an tha hle mai. He hnatlang hian vawilehkhata he luipui thenfai duak chu thil tih theih loh a ni tih an hai lova. Mahse an tum ber chu lui tui humhalh a, tih thianghlim a ni.
Kan sual reng vanga che tawp leh che duh dah kan ni lova. Lui tui tih thianghlim hi a nachang kan la hriat tawk loh vang zawk a ni a. He hnatlang vang hian mipuite hnenah tui ti thianghlim turin kan khawsak danin a hril a ni tih mipuiin nasa takin kan hriat phah ngei ang. Kan nitin khawsak a kan bawlhhlawh paih dan thlenga in enlet nan kan hman ngei a beiseiawm.
Khawvelin mihringte khawsakna atana pawimawh ber mai tui thianghlim hi a buaipui tawh a. A tel lova kan nun theih lohna tui thianghlim nei thei turin sum leh pai pawh an seng nasa tawh hle. India ram lui lian Ganges bawlhhlawh lutuk chu mihring hriselna leh nunna a nghawng tawh a ni tiin India sawrkar chuan mangang takin kum 2014 khan Clean Ganga project tiin pawisa pawh cheng vaibelchhe 20000 lai a ruahman nghal a. Tunhnaia report ah chuan Ganges lui tui hi a hma aiin a thianghlim hle tawh a ni an ti.
Keini pawh hian hnatlang ngawt chuan kan luipui hi kan ti thianghlim zo tak tak dawn lova. Central sawrkar ruahmanna ang hian kan tui tlan ber Tlawng tui ti thianghlim tur hian project liantham siamin sum leh pai ruahmanna te nei zui nghal thei se. Kumthar budget ah pawh lo lang hial se a duhawm. Pawl leh mimal piah lamah sawrkar a chet chuan kan tui tlan hi kan ti thianghlim leh thei ngei turah beisei ila. SAVE TLAWNG PROJECT sawrkarin pawisa nena a ruahmanna ngei i lo thlir ang u.