Inter Milan chuan season thar atan an squad an tichak a, midfielder Henrikh Mkhitaryan leh goalkeeper Andre Onana te free transfer in an lalut.
Kum 33 mi Armenia international hi an ram mi zinga Inter Milan tana khel hmasa ber a ni dawn.
AS Roma ah tun nipuiah contract a neih a hmang zo a. Rome khawpuiah hian kum thum hun a hmang. Hemi hma hian Borussia Dortmund, Manchester United leh Shakhtar Donetsk te bakah Arsenal tan a khel tawh.
“Club ropui tak ka zawm tur hi ka lawm a, he team hian hlawhtlin tumna lian tak a nei a, hemi kawngah hian ka puih theihna turin theihtawp ka chhuah ang.” tiin a sawi.
Roma tan kum thum a inkhelh chhungin match 117 a khel a, goal 29 khungin midang goal khung tur vawi 28 a siamsak tawh.
Inter Milan hian an hnena contract a ziah rei zawng hi puangzar lo mahse Mkhitaryan hian kum hnih contract a ziak a ngaih a ni a. “Nerazzurri kawr a hak rual hian Inter player ropui, Armenia thisen kai dang Youri Djorkaeff kan hrechhuak lo thei lo.” tiin an player thar chungchang hi an sawi ve bawk.
Mkhitraryan hi tun nipui a Inter Milan in player an lakluh palina a ni a. Chelsea atangin Romelu Lukaku chu loan in an hawh fel tawh a. Empoli midfielder Kristjan Asllani pawh lalut tawhin Ajax goalkeeper Andre Onana chu an lalut tel.
Kum 26 miCameroon goalkeeper pawh hi Amsterdam a contract hmang zo a ni a, Inter ah hian kum 37 mi ni tawh Samir Handanovic-a no.1 nihna chu a rochun zui tura ngaih a ni.
Inter-ah Onana hian kum nga contract a ziak a, Ajax tan kum sarih leh a chanve a inkhelh chhungin inelna hrang hrangah vawi 214 a inkhel.
An rama Samuel Eto'o Academy atanga Barcelona academy zawmtu Onana hi damdawi hman phal loh avanga thla 9 hrem a nih hnuah nikum November atang khan a inkhel leh tan a. Inter tana khel Cameroonian palina a ni ang.