Tun hnaia Mizoramah ruihhlo a hluar thu an sawi a, an koh ber chu heroin a ni a, kum 2021 atang khan a hluar zuala ngaih a ni a. Sawi hluar chawp mai a ni lo a, nikum khan Mizoram Police leh Excise & Narcotics Department-in an man belhkhawm chu kg 34.527 a tling a, kuminah kg 19.814 an man tawh bawk.
Mizorama heroin an man tam ber hi Myanmar atanga tawlh a ni a, demand a san em avanga tawlh luh a tam phah nia ngaihdan awm erawh ruihhlo do kawnga hmalatu langsar ber, END hotute erawhin an pawm lo a, “Demand a san vang lam niin a lang lo a, a hralhna tur hriat sa loa rawn risk thlakpui hi kan man tam,” an ti.
Kum 2021 kum tira Myanmar sipaiten sorkar an pawnglak hnuah an ram chhung ei leh bar a tlahniam nasa a, hemi hrin chhuah hi Mizoramin a tuar a, Myanmar atanga heroin hmanga sumdawnna hi a hluar zual ta nia ngaih a ni.
END hotute chuan, “Kan mi mante kan zawha an sawi chu Myanmar ram a buai avangin eizawnna kawng a buai thute min hrilh a, chumi avang chuan sum hmuhna atan heroin hi an rawn tawlh ta tihte an sawi,” tiin The Zozam Times an hrilh.
Tun hnaiah police leh excise-ten heroin an man hnem a, January atanga May, thla nga chhungin kg 19.814 an man tawh. Department pahnihte hian tangkawpin ruihhlo an man tihna a ni lo a, a hran ve vea an man belhkhawm a ni.
END hotute chuan, thla nga chhunga kg 19 an man tawh chuan kumin kumtluana an man hian nikuma an man a khum ngei an rin thu an sawi a, ruihhlo do kawnga hmalatu department pahnite hian theihtawp chhuah mah se supply a tam em avangin man rem thei a ni lo tih an sawi.
Kum 2019-a department pahnih heroin man belhkhawm chu kg 23.711 a ni a, kum 2020-ah hri a len avanga mipui khuahkhirhna khauh tak kalpui a nih avangin a tla hniam hret a, kg 20.363 an man.
Kum 2021-ah erawh heroin hi a hluar ta viau a, police leh excise force-ten a hran ve vein heroin thahnem tak tak an man fo a, an pahnih man belhkhawm chu kg 34.527 a tling ta reng a ni.
Dan kengkawhtu lamin supply a tam thu an sawi rual hian Mizo thalai zingah heroin ti thar an tam hle tih ruihhlo ngaite enkawltu doctor thenkhat chuan The Zozam Times an hrilh.
Aizawl khawpui leh district danga ruihhlo ngaite enkawlna hmuna awm zingah pawh heroin ti thin an tam ber a, a dawtah zu avanga buai an tam leh bawk.
Ruihhlo ngaite enkawl thin doctor pakhat chuan a tawnhriat atanga a thlirin ‘Mizo thalaite hian ruihhlo hi an va duh ve’ tih ngaihdan a neih phah hial tih a sawi a, ruihna tur hrim hrima siam ni lo, damdawi atana hman tur chi hmang sual an tam thu a sawi.
Doctor-in damdawi an chawh thin thenkhat chu ruih nan hman thin a ni a, thalai zingah nachhawkna leh damdawi dang ruih nana hman sual ching an tam tiin, hemi avang hian taksa tana damdawi mamawh tul leh pawimawh pek chhuah ngam lohte pawh a awm fo phah tih a sawi a ni.
Hetihlai hian ruihhlo ngaihna chu dam lohna serious tak, ‘a dam tawh emaw tih hnu pawh na chhuak leh thin ang, natna benvawn’ ang a nih thu a sawi a, chutihrual chuan sim theih, tih tawh loh thei a ni tiin, sim hlen tur erawhin tawrh hram hrama beih a ngaih thu a sawi.
Ruihhlo ngaihna hian mi mal leh chhungkuaah nghawng tha lo tak a nei a, chhungkaw tam tak an rum a, an faten ruihhlo an ngaih avanga mi mangang nu leh pa tam tak an awm. Nu leh pate hi an rilru damlo chu enkawlsak ve ngai tho an nih thu doctor chuan The Zozam Times a hrilh.