Aizawl: Pachhunga University College (PUC), Aizawl chu India Today chanchinbuin kum 2022 chhunga India hmarchhaka Arts leh Science zirnaa tha berah a thlang.
India rama chanchinbu lianin kum tina India ram college tha a thlan thin, ‘The Best Colleges in India’-ah PUC chu a vawi khatna atana langin Arts zirnaah ram pumah 141-na niin, India hmarchhakah pakhatna a ni a, Science-ah ram pumah 167-na niin hmarchhakah pakhatna a ni.
Commerce zirna-ah 183-na niin hmarchhakah pathumna a ni bawk.
India Today chuan India ram hmun hrang hranga zirna inte uluk taka zirchiangin tehfung paruk hmangin a endik a. Arts leh Science-ah Hindu College, New Delhi chu pakhatna an ni a, Commerce-ah Shri Ram College of Commerce, New Delhi; Medical-ah AIMMS, New Delhi; Engineering-ah IIT, New Delhi te pakhatna an ni.
PUC-ah hian under graduate-ah Arts, Science, Commerce leh Management zirna awmin department 23 a awm a, Post-gradute - MA leh MSc zirna department panga - Mizo, Pholosophy, Life Sciences, Geo-Physics, Statistical Mathematics a awm a. Life Sciences-ah Ph.D zirna seat 10 a awm a, Mizoram University kaltlanga PUC hnuaia Ph.D zir mi 60 chuang an awm mek a ni.
NAAC accreditation A+ college niin, ISO certified college a nih bakah DBT Star college a ni mek a. NIRF ranking-ah India ram college tha 101-150 inkarah awmin ramngaw a neih that avangin Green Audit 2021-ah a sang ber, ‘Platinum rank’ pek a ni bawk.
Central university hnuaia awm a nih avangin kumin hian PUC-ah Central University Entrance Test (CUET) paltlangte chauh admission pek theih an ni a. Seat 1,120 hnawh khat turin India ram hmun hrang hrang atangin dilna 1,04,953 an dawng tawh niin PUC thuneitute chuan an sawi.
Kum kalta khan zirlai 3,100 an nei a, kuminah a aia tam an nei dawn nia sawiin ram dang zirlai pahnih an nei mek niin an sawi bawk.