Aizawl : Sports Minister Robert Romawia Royte-in Inrinni khan Serkawn leh Zotlang, Lungleia Integrated semi indoor hall sakna tur leh Pukpui-a Laldenga Futsal Ground siamna tur lungphum a phum.
Heng thil pathum te hi sorkar laipuia Minority affairs ministry hnuaia PMJVK atanga Rs. nuai 596. 91 senga siam tur niin, senso zaa 90 sorkar laipui tum tur niin, za-a 10 state sorkar tum tur a ni. August ni 31, 2021 khan senso tur 1st instalment chu sorkar laipui atanga dawn a nih tawh thu sorkar thuchhuahin a tarlang.
Sorkar thuchhuahin a tarlan danin, Serkawna Integrated semi-indoor hall leh Zotlanga Integrated semi-indoor hall sakna atan Rs. nuai 139.69 ve ve pawm niin, M/S Junior Consultancy Services, Tlangnuam, Aizawl chu heng hna thawk tura thlan an ni a. Pukpuia Laldenga Futsal Ground siamna atan Rs. nuai 317.53 pawm niin, M/S Creative Minds, Chanmari West, Aizawl te he hnathawk tura thlan an ni.
Sports Minister Robert Romawia Royte chuan Sports deptt-in Holiday football program – school chawlh nia naupang infiamna tur Aizawlah bultan a tum thu a sawi a. Serkawna Baptist Church of Mizoram (BCM) hmunpui tihchangtlunna tur project pawh BCM hotute rawn chungin -pilgrimage rejuvenation and spiritual augmentation drive (prasad scheme)- chhawr thei tura hmalak a nih thu sawiin, Ministry of Tourism-in a thuphunga a pawmpui tawh thu a sawi a. Serkawna BCM Hqrs. chu kohhran mi leh khualzin tana tlawh nuam leh chakawma siam tum a nih thu a sawi bawk.