Russia khawpui, Moscow thuneitute chuan eng industry pawhin a hnathawkte 60% talin vaccine vawi khat tal an la tur a ni tih thuchhuah an siam a, July 15 thleng hun a hawnsak.
Vaccine hi mahni duhthlanna ngei a ni tih Kremlin thupuangtu, Dmitry Peskov chuan a puang a. “Tu pawhin a duh loh chuan tihluih theih an ni lo; mahse, an ei zawnna erawh chuan a tuar thung thei,” a ti.
“Muscovite-ten vaccine lak ngei ngei ngaihna Service sector-ah an thawk a, an la duh lo lui a nih chuan an hna an bânsan phah a ngai ang. Vaccine lak kher an phut lohna hmunah hna an zawn mai a ngai ang,” a ti.
Thawhtanni atang khan Moscow mipuite chuan vaccine an lakna certificate leh tun hnai thla ruk chhungin Covid-19 an kai lo tih lanna lehkha chu cafe leh thingpui dawra an chawlh dawnin a neitute hmuhtir ngei ngei a ngai tawh.
Russia-ah hian hri a darh thar leh mek a, Moscow leh St. Petersburg khawpuiah chuan Thawhtanni khan Covid-19 vanga ni khata thi an tam ber tum an tawng ve ve.
Russia ram hian a tirah chuan mi tam zawkin vaccine an lak theih nana thlem nan circus ticket atanga a thlawna car dawn theihna an buatsaih a. Mahse, lak tum an pun phak vak loh avangin inkaihhruaina khawng zawk an kalpui tan mek a ni.
Sorkarin hma a lak mek lai hian vaccine la tawh tih lantirna certificate lem siam a hluar mek niin an ram chanchinbute chuan an tar lang.