Mipa tennis chanchin a Grand Slam title la hnem ber Rafael Nadal chuan Wimbledon fourth round a lut a. Inkhelah hnehna chang turin harsatna tawk lem lo mahse inkhelh laia thil thleng avangin entute sawizui a hlawh.
Spanish star hian Lorenzo Sonego hmachhawnin a kheltha hle a. 6-1 6-2 6-4 a hnehna changin round hmasa pahniha a a inkhel aiin hma a sawn hle.
Nimahsela set thumna an khelh laiin Nadal-a chetdanin entu mipuite tan loh a hlawh. Stadium chung khuh a ngaih avangin inkhel a khaihlak a, hei vang hian Nadal a lawm lo. An inkhelh chhunzawm leh hnuah game hnih an khel tihin Nadal a lungawi lo leh a, hei erawh a khingpui Sonego lakah a ni a, Sonego chet danah lawm lohna a nei.
Umpire hnenah zualko in a khingpui hi net bulah inbiakna a neihpui bawk a. Nadal hian game khat a hloh zui. A tawpah erawh a chak zawkah a tang ta tho.
Nadal chuan a chetdan chu dik lo tiin inkhel zawhah thupha a chawi a, “Net ah khan ko phei tur ka ni lo, kha kha ka tih dik loh a ni a, thupha ka chawi duh. Ka tih loh tur a ni a, ka hai lo.” a ti a.
“A inkhel tihbuai kha ka tum lo hrim hrim a, kan inkhelhin player-ten kalphung kan nei thin a, chumi ah chuan han sawifel tur kan nei a, chu zawng chu a ni.” a ti.
Mipa inkhel dangah Greek fourth seed Stefanos Tsitsipas chuan fourth round a thleng zo lova. Chanchin ngah tak Australian mi Nick Kyrgios lakah a tlawm.
Player talent nei tha pahnihte tennis khelh a hmuhnawm a, umpire khak ngaia an awm ve ve hnuah kum 2014 a quarter-final khel Kyrgios 6-7 (2-7) 6-4 6-3 7-6 (9-7) in a chak.