National Highways and Infrastructure Development Corporation Limited (NHIDCL) in Aizawl leh Keifang inkara kawngpui laih leh siam mekte Inrinni khan MJA Gen. Hqrs bultumin Aizawla journalist-te’n an tlawh a. Hmun thenkhata kawngpui laihna lei vung paih dan chu a dik tawk lo ngei tih an finfiah.
MJA member-te hian Zemabawk atanga Keifang inkar kawngpui siam mek te an enfiah a. Hmun hrang hrangah kawng laihna leivung tam tak a paihna hmun (spoil bank)-a paih loin kawng thlangah an hnawl thla ngei tih an hmu a, leivung paih lai ngei pawh an hmu a. Hmun tam takah kawng thlanga leivung paihin lui te a hnawh nasain, leivung paih hian thing leh mau a tihchhiat nasat bakah, luia nungchate tan thil pawi tak a thlen ngei tih an hmu bawk.
MJA hian NH kawngpui enkawltu leh siamtu NHIDCL bakah an hnuaia kawng siamtu company-te chu nungcha te, thing leh maute'n kawngpui siam an tawrh lutuk loh nan leivung paih dan uluk zawkin kalpui se an duh tih an sawi a. A paihna hmun tura siamah paih a, a tul anga spoil bank siam belh tur te, spoil bank chu tha taka dawl tur te, spoil bank-ah chauh leivung paih tawh turin an chah a. Mizoram sorkar pawh thuneihna a neih chinah tun aia chik zawka enpui tur leh vil tura an duh thu an sawi.
Kawngpui siam entu MJA member-te hi Saitual DC VL Hruaizela nen DC Conference Hall-ah an inkawm a. Saitual DC chuan, kawngpui siam endiktu tur Highway Monitoring Committee an din tawh thu te, kawng siamtute hnenah hriattirna vawi eng emaw zat an pek tawh thu leh an hna thawh lai an tihtawpsak thin thu te, chutih rualin an endik reng theih loh thu te, an hnate a tul anga an endik thu te, kawng an laih dan hrim hrimah dik lo a tam thu te, NHIDCL-in an hnuaia contractor-te an thunun loh thu te, an lei vung paihin a thlang lama sangha dil leh luite a khawih chhiat nasat thu te, mipui atangin complaint a tam thu te leh lei laih vanga leiminah mi pahnih an thih tawh thute a sawi bawk.
NHIDCL website-a a lan danin, Aizawl atanga Seling NH54 hi Gawar Pvt Ltd leh SCCPL te inkawpin an thawk a. July 25, 2023-a siam zawh tur a ni. NH-6 kawngpui, Seling - Keifang chu GVV Constructions leh NG Projects ten chan insema an siam a ni a, zawh hun tura ruahman chu January 7, 2022 niin, a hunah an siam zo hman lo a ni.
NH kawngpui siam mek ennaah hian MJA Gen. Hqrs. vice president Lalremsiama hoin Aizawla journalist 17 an kal a, Saitual atangin MJA member-te'n an tawiawm a ni.