Mizoram sorkar hnuaia thawkten sorkar laipui hnuaia thawkten dearness allowance (DA) an lak zat pe ve turin vawi eng emaw zat state sorkar an lo ngen tawh a, an thil phut tihhlawhtlin a la nih loh avangin tun hnaiah sorkar kar nan ni nga chhung badge dum an bel leh a, hei pawh hian state sorkar a la ko eih zo lo a, thu lawmawm dawn an la nei lo.
Sorkar hnathawkte hian an intelkhawmna pawl, Federation of Mizoram Govt. Employees & Workers (FMGE&W) kaltlangin state sorkarah phut hrang hrang an lo nei tawh thin a, a hun taka hlawh an lak loh avang te, DA tihpun ngiatin February 21-25 chhung khan badge dum bel an lo tum tawh a, sorkarin an hlawh chu a hun taka pek a tiam leh DA an lak thin 17% chu 28%-ah a tihsan avangin lungawi lohna lantir an tum chu an lo thulh tawh.
Khatih tuma sorkar intiamna chu financial year-ah DA 31%-a tihsan a ni a, sorkar hnathawkten an phut erawh sorkar laipuia thawkte lak ang DA 34% lak a ni thung.
FMGE&W chuan May 19 khan chief minister hnenah ngenna theh lutin DA 34% pek thuai an phut thu leh May thla thleng sorkar ngaihchan an tum thu an thlen a. An ngenna hi May thla ral hmaa tihhlawhtlin a nih loh chuan June thlaah general council meeting koha hmalak zel dan tur rel an tum thu an ziak lang.
Sorkarin an duhnate May thla chhunga a tihhlawhtlinsak loh avangin June 13, 2022 khan general council meeting neih a ni a, hemi tuma an rel angin June 27 atanga July 1 chhung khan an hnathawhna hmunah badge dum an bel.
DA 34% pe tura sorkar kar nana ni nga chhung badge dum an bel tawh hnuah pawh sorkar atangin thu lawmawm dawn an la nei lo tih FMGE&W hruaitute chuan The Zozam Times an hrilh.
FMGE&W hruaitute chuan lungawi lohna an lantir ni nga chhung khan sorkar hotu lamin pawl hruaitute an dawr lo tih an sawi a, “A reh vung vung a ni ber a, indawr kan nei lo,” an ti.
An pawlin an lo rel tawh angin sorkar atanga thu lawmawm an dawn loh avangin tun kar chhoah FMGE&W executive committee an thukhawm leh dawn tih sawiin an hmalak zel dan tur an sawi dawn a, na taka kal pawh an duh tawh mai thei tih an sawi bawk a ni.