Aizawl Municipal Corporation (AMC)-in in sak chungchang leh tul danga mipuiten ziaka an harsatna an thlenna tur complaint box chu AMC hmunpui, |huampuiah an hung a, complaint lut tawh zinga a tam ber chu Building Regulation, 2012 dan bawhchhiate chunga hma la tura ngenna a ni.
AMC Complaint Box hi June 13 khan hun tan a ni a, he bawma complaint lutte chu kar tin Zirtawpniah endik thin a ni.
Complaint box viltu AMC Enforcement Committee chairman, Councillor John Zosangliana Ralte chuan bawm an hun tanna a la rei loh avangin complaint lut pawh a la tam lo tih The Zozam Times a hrilh.
Kar kalta Zirtawpni thleng khan complaint 10 vel an dawn tawh thu sawiin, “Heng zinga a tam ber chu Building Regulations, 2012 dan bawhchhiate hekna a ni a, a hmun loa leivung paih chungchang pawh pakhat a tel,” a ti.
Complaint an dawn zinga hmun hnih chu an enfiah tawh tih sawiin, “Dan loa in sate an ni a, an thenawm hnaiten complaint an rawn theh luh a ni,” a ti a, chung mite chu danin a phal baka hma an laknate chu hun tiam chhunga thiat tura an hrilh thu a sawi.
AMC Enforcement Committee hmalak theih chin sawiin, “Keini committee hi chu dan loa thil tite a hmuna va enfiah tur kan ni a, dan bawhchhiate chu dan anga hma an lak theih nan hun tiam neiin vauna thu kan pe a, a hremna kenkawh tak erawh kan kut a ni lo,” a ti.
Dan loa thil tite hian hun tiam chhunga ti tura an tih anga hma an lak loh chuan an chung thu rel turin Executive committee-ah an thlen leh a tul dawn tih John Zosangliana Ralte chuan a sawi.
Enforcement Committee hian subject panga - Building Regulation 2012, Solid Waste Management by Laws 2019, Site Development & Slope Modification Regulation 2017, Licencing Regulations leh Advertisement & Hoarding Regulations te an vil a, heng subject panga chhungah hian complaint a thehluh theih a, kar tin Zirtawpniah complaint lutte chu endikin, en zui tlaka ngaihte chu a hmunah kalin enfiah thin a ni.