Danish defender Andreas Christensen chuan Barcelona a zawm tih club in an puang a. Chelsea a contract a hman zawh hnuah free transfer in Spain a pan.
Kum 26 mi hian Stamford Bridge-ah contract a ziah belh dawn lo tih a chian hnu atangin Spain nena sawizawm a hlawh nghal hle a. Barcelona nen hian sawizawm an nihna a rei tawh a, mahse Catalan club in sum lamah harsatna an neih avangin engkim tihfel nghal mai theih a ni lo.
Tunah erawh inremna an neih fel tawh thu puan a ni a, Barcelona hian a manah sum an sen loh avangin Christensen hi kum li contract an ziahpui a. Thawhtanni a an lakluh fel Franck Kessie contract rei zawng nen a inang chiah a, leichhuah theihna an neih pawh inangin Euro maktaduai 500 release clause an nei.
Barca sum dinhmun chungchangah hian zawhna a la awm a, nimahsela Blaugrana hian Spanish football in hlawh a hman theih chin a bituk chu an la pel lova, player ziahluh ah buaina an nei dawn lo tih an sawi.
Kum 16 mi a nih a Chelsea zawmtu Christensen hian first team tan vawi 161 a inkhel hman a. Hemi hma hian Bundesliga lamah season hnih hmangin Borussia Mönchengladbach tan match 82 a khel hman.
Kum 2015 khan Denmark tan khel tanin vawi 56 ram tan a inkhel tawh.