Champhai district-a hmasawnna hnathawh ten leilung/environment tichhe lo tura inkaihhruainate an zawm that leh zawm that loh enfiahtu Champhai district level monitoring committee-in nimin khan an Champhai Bawrhsap James Lalrinchhana hovin, National Highway 6 siam mek an endik.
District level monitoring committee chuan Champhai leh Khawzawl district inrina khawchhak Tuipui atanga endik hna tanin, NHIDCL leh an hnuaia contractor Shri Balaji Construction Ltd. hnathawh te an endik a. Co- mmittee chuan a tlangpuiin harsatna liantham a thleng rih lo nia an hmuh thu an sawi.
Saikah luiin Tuipui a finnaa leivung tawlhin harsatna a thlen chu a tul anga bawhzui turin company hotute an hriattir a. Leivung tawlh tur danna gabion wall leh check dam siamte pawh enfiahin, siam belh tul leh mamawhte chu company hotute bawhzui turin an hriattir nghal bawk.
Champhai district level monitoring committee chuan NHIDCL aiawhte leh an hnuaia contractor-te chu hna tlo leh tha, environment tichhe lo zawnga siam tum turin an chah a. Dan te ngaipawimawh chunga hna thawk turin an hrilh.
Hmalak bultan hmain environment clearance neih hmasak a tul thu leh kawng siam nana thing kih te aiawh tur thing tam zawk phun tur pawhin an hriattir a. Thing phun leh hun hmasa berah kawng siam nana ramngaw tihchereu phuhru zo ngei tur thing phun a nih theihna tura hmalak dan turte an sawipui.
Kawng siamtu leh khawtual mite inkarah thawhhona tha a awm zel a tul thu leh kawng siam avanga harsatna thleng thinte pumpelh a nih theih dan turte an sawiho a. Company lam hotute chuan Chhungte atanga NH 6 pawh tur kawng kilometre 1 dawna thui siam a nih tur thu an sawi bawk.
NH 6 laih mek Khawzawl leh Champhai inkar hi KM 26.78 a thui niin, leivung paihna tur bik hmun 35 ruat a ni a. Champhai dist chan lam khawchhak Tuipui leh Khankawn inkar, KM 11 vela thuiah hmun 16-ah leivung paihna Muck Dumping Site 9 leh Spoil Bank 7 ruahman a ni.