India ramah darkar 24 liam ta chhung khan mi 13,086-in coronavirus an kai tih hmuh chhuah leh hman niin mi 4,35,31,650-in an kai tawh.
Union health ministry chuan hri kai enkawl lai mi 1,14,475 an awm mek tih a tar lang bawk.
Darkar 24 liam ta chhung hian mi 19-in thihpui leh hmanin mi 5,25,242-in an thihpui tawh.
Hri kai hmuh tawh zawng zawng atanga chhutin a kai enkawl lai hi 0.26% an ni mek a, 98.53% erawh enkawl dam an ni tawh tih ministry chuan a tar lang.
Darkar 24 liam ta chhung hian enkawl dama chhuahtir aiin a kai hmuh an tam zawk avangin mi 611-in enkawl lai an pung leh hman a ni.
Hri a len tan atang khan sample vaibelchhe 86.44 endik tawh niin darkar 24 liam ta chhungin sample 4,51,312 endik an ni bawk.
Darkar 24 liam ta chhunga endik zinga 2.90% chuan hri hi an kai tih hmuh a ni a, chawlhkar khat liam ta chhunga endik zinga 3.81%-in an kai tih hmuh a ni bawk.
Invenna pek beihpui thlak pawh kalpui mek zel niin vaccinde dose vaibelchhe 198 chuang pek a ni tawh.
Thi mi 19 chhinchhiah thar zinga mi pathum chu Maharashtra-a mite niin Kerala, Punjab leh Rajasthan-ah mi pahnih theuhvin an thihpui bawk.
Mi 5,25,223 thi awm tawh zinga 1,47,943 chu Maharashtra-a mi niin a tam ber an ni a. Kerala-ah mi 70,048, Karnataka-ah mi 40,120, Tamil Nadu-ah mi 38,026 leh Delhi-ah mi 26,272 an thi tawh bawk.