Mizo National Front (MNF) president, Chief Minister Zoramthanga chuan a kaihhruai MNF sorkar chu leiba ngah nia mi thenkhatin an sawi chu thu dik an hriat loh vang tih sawiin, Mizoram chu hmarchhak state zinga leina nei tlem pathum zingah a tel tih a sawi.
Nimina Mizo Hnam Rûna mi thar lawm luh inkhawmah thu sawiin MNF president hian mi thenkhatin Mizoramin leiba ngah lutuk anga an sawi chu thu dik an hriat tawk loh vang tih sawiin, “‘MNF sorkar chu leiba ngah’ tiin mi thenkhatin sawi mah se thu dik an hriat tawk loh vang a ni. NE state zinga leiba nei tlem pathum zingah kan tel,” a ti.
Chief minister hian tun hnaia Asian Development Bank (ADB) atanga sorkarin loan a puk tum mi thenkhatin an sawisel chu an hriat chian tawk loh vang a ni tih sawiin, “ABD atanga loan Rs. vbc 1,000 kan puk atangin, Rs. vbc 280 chauh rulh let a ngai dawn a. Sorkar laipuiin Rs. vbc 720 min rulhsak dawn tih an hriat loh vang a ni,” ti bawk.
MNF party chu Pathianin a tawk têin a hruai zel tih sawiin Zoramthanga hian MNF-in harsatna a paltlang hi mi mal anga an tawrhna nasa viau mah se, movement avanga an tawrhna a nasa zawk tih a sawi a. Mizoramah political party tam tak lo piang tawhin thenkhat phei chu mi fel leh langsar tak takin an din a, hetiang karah mi tlawm têtê kalkhawmin an din, MNF party chu Pathianin a kaihhruai dan a mak a, Pathian hriat an nih avangin an party chuan kum 60 hmel an hmu tling thei chu ropui a tih thu a sawi.
MNF president chuan Congress party chu beih tham an awm tawh lo tih a sawi a. “Beih lutuk chi pawh an ni lo, an morale a down ang,” a ti a. Kalphung thar tia kalphung thlak zing deuh an awm thute a sawi a. MNF chu a tir atangin kalphung ngai rengin a la kal tih sawiin, “MNF atanga chhuakte chu a che fuh ngai lo. Hnam thuthlung kengtu kan nih tlat avang hian sengkhawm hna kan thawk mek a ni,” a ti.
Mizo Hnam Rûn-a lawm luhna inkhawmah MNF president hian J Malsawmzuala Vanchhawng, ZONET news editor thawk lai a lawm lut a. MNF party-a lawm luh thar hian thu a sawi a. Inkhawm hi MNF Vice President Vanlalzawma’n a kaihruai a ni.