Coach thar hnuaiah an khelh dawn avangin tun nipui a team insiksawi nasa tak tura rin zingah Manchester United an tel a, nimahsela an club tantute leh football khawvel beisei angin player lakluh lamah an che chak lo.
Erik ten Hag-a hnuaia an player lakluh hmasak ber ni turin United hian Thawhlehni khan Dutch full-back Tyrell Malacia chu Feyenoord atangin an lalut fel.
Kum 22 mi Netherlands international manag hian Euro maktaduai 15 an seng a, Euro maktaduai 2 an la pek belh leh ang. An hnenah kum 2026 June thleng contract a ziak a, kum khat ziah belh theihna a nei.
“Ka tan bung thar a ni a, league tharah teammate thar te nen, manager tha tak kaihhruaina hnuaiah hna kan thawk dawn. He club ka zawm avang hian ka lawm hle.”
“Eredivisie-ah a enkawl tawh team ka hmachhawn fo thin a, a theihna sanzia leh a player te laka a beisei san zia ka chiang. Ka la naupang a, hmasawnna tur ka la ngah tih ka hria. Mahse heti chung hian he kawr ha a khelmual ka luh apiang hian ka theihtawp ka hlan dawn tih United fans te ka tiam.” a ti.Tunge Malacia?
Netherlands tana vawi 5 khel tawh Malacia hiFeyenoord youth academy chhuak niin kum 9 mi a niha a zawm tawh club hnenah kum 13 a hmang hman a, senior team tan vawi 136 inkhel tawhin goal li a khung bakah assist vawi 10 a nei tawh.
United-ah hian first choice left-back Luke Shaw nen khelhna hmun inchuh tura ngaih an ni a. Hetihlai hian Brazilian full-back Alex Telles leh English rawlthar Brandon Williams te chu club in chhuah an phal dawn niin an sawi thung.
A coach hlui Giovanni van Bronckhorst chuan, “Malacia hmachhawn tur winger hi an inkhelh hma in an buai ve hle thin ngei ang. A che rang a, a insiamrem chak bawk a, a taima em em bawk.” tiin a lo fak tawh.Eriksen pawh
Denmark midfielder Christian Eriksen chuan free transfer a Manchester United zawm turin an sawmna a pawm a. United-ah hian kum thum contract a ziak ang a, Old Trafford-ah tunkarah medical nei fel tura ngaih a ni.
Eriksen hi Ten Hag-a player lakluh pahnihna a ni dawn a, Dutch coach hian a midfield-ah ball pass thiam neih belh a duh a, ani bakah hian Barcelona midfielder Nigel de Jong te chu a mual lai luah tura neih ngei a duh.