Basketball inelna sang Mizoram Super League khelhmekah post-season inkhel tan a ni a. Thawhtanni zana Play In inkhel hmasa berah Tuikual South BC an chak.
MSL7-ah league a sang pali in Play In tournament an khel a. A sang pali hi an tling mai a ni lova, table-ah a sang zawkin dinhmun tha an chan avangin a pawimawh.
Thawhtanni zanah pathumna a awm Mission Veng Hotshots leh palina Tuikual South Basketball Club te an inkhel a. 94-84 in Tuikual South an chak a, hun pawimawhah tlawm duh lohna thinlung lian tak nena an khelh an chakpui.
Pathumna leh palina inkhelah palina zawk an chak avangin vawikhat an inkhel leh dawn a, heta chak zawk hian pakhatna leh pahnihna inkhela tla zawk an hmachhawn leh ang.
Tuikual South tan Darrell Bowie chuan point 37 leh rebound 20 a la a, assist vawi 8 neiin a langsar a. Mizo player zingah Lalnunpuia chuan point 21 score in hma a hruai a, Dennis Lalmuanpuia chuan point 18 leh rebound 15 a la. Tuikual South tana tangkai tak F. Zodinthara a pawimawh a, point 14 leh rebound 5 leh assist vawi 2 a nei a, court chhungah a team fuih phurtu a ni thin.
Mission Veng Hotshots tan Joshua Aaron Keyes chuan point 31 score in Lalrozama’n point 25 a score ve bawk.
Zanin dar 8:30 hian team pahnihte hian game 2 an khel leh dawn a. He inkhel a chak zawk hi an tlang tawh ang.
Nizan khan league hmahruaitu Zarkawt BCA leh Khatla TBL te an inkhel a. Khatla TBL in final a hmun tichiang turin vawi hnih chak an mamawh a, Zarkawt BCA tan nizana hnehna chan a tawk ve dawn thung