Spanish police-te chuan ral atanga tui chhunga khalh chi, Morocco a\anga ruihhlo tawlh nana hman, underwater drone pathum an man.
A khalhtu chuan ngai lo, ral atanga thunun chi tuihnuailawng tenau chi pakhat hian bungrua kg 200 vel a phur thei.
Thla 14 zet an chhui hnuah he thil kaihhnawihah hian Cadiz, Malaga leh Barcelona-ah te mi pariat an man bawk.
Police chuan an thil man chuan hetiang hmanrua siama Europe hmun hrang hranga tawlh rutu pawl ni ngeia hriatte an tikeh darh niin an insawi.
Spanish police hian tun hi ral atanga thunun chi tui chhunga khalh thei thil an man vawi khatna a nih thu an sawi bawk.
“Heng thil hmang hian ruihhlo tawlhtute hian Strait of Gibraltar-a hmun kilkhawr ber thlengin a hlawm lianin an phur thei a ni,” an ti.
Strait of Gibraltar hi Morocco leh Spain then hrangtu tuipui zim tak a ni.
Tuihnuailawng an man pakhat hi sak pum vek tawh a ni a, pahnih erawh la siam lai mek a ni a. A pahnih hian French gang hnenah cocaine tawlh nana hman tura an duan niin an ring.
Thuneitute hian hashish kg 14, marijuana kg 8, €1,57,300 (£135,527) chuang leh vansanga thlawhtir chi drone lian tak paruk an man bawk.
An thil man hi GPS navigation system-a thuam niin awlsam takin, tablet mawlmang tak ang maia khawi hmun atang pawha thunun theih a ni.
An mi man zinga pahnih chu pafa an ni a, pakhat chu helicopter pilot puitling, hetiang lawng siam tura technical lama hriatna nei zau tak a tel bawk.
Thuneitute chuan an pawl hian ruihhlo tawlh nan van, khawmual leh tuipuia hman tur hmanrua tha tak tak neiin Denmark, Italy, France leh Spain-a pawl dang hnenah an thawn thin niin an sawi.
EFE news agency chuan an chhui zui zelnaah ruihhlo tawlhna thil dang 13 pawh an man a. Heng zingah hian lirthei hnunghnuh, a chhuat inthuaha a hnuaia zawka bungrua kg 800 lai phur thei pawh a tel.
Tun hi tui chhunga kaltir chi ruihhlo tawlhna hmanrua man vawi khatna a ni lo va. Kumin kumtirah khan cocaine tonne li zel phut tuihnuailawng ang deuh chu Colombian navy-in Central America a pan laiin an lo man tawh.
Nikum khan Spain-ah hian police-in tualchher metre 9-a sei, fibreglass leh plywood hmanga siam tuihnuailawng chu Malaga-a kudam pakhatah an lo man tawh bawk.