United States police chuan Highland Park, Illinois-a Independence Day parade chhimtute pawngkahna thlenga mi paruk zet kah hlum an nih hnuah a kaptu ni ngeia rin chu an man ta.
Kum 22 mi, Robert E Crimo III hi rei vak lo an umzui hnuah an man tih police chuan an sawi.
Mi kap tur hian in chungah a lawn a, parade thlirtute chu rifle tha takin a pawngkah ta a ni.
Tun hi US-a inpawngkahna thleng tharlam ber a ni a, kuminah hian chawlhkar tin thleng ziah ang a ni a. President Joe Biden chuan tharum thawhna thleng hian ‘a barakhaih hle’ tih a sawi.
Highland Park-a inkahna a thlen hnuah hian Philadelphia-ah Fourth of July fireworks display (hal mawi halna)-ah police officer pahnih kah hliam leh an ni.
Crimo-a hi silai a hmeh puah hnuah hian zawn zui a ni a. Thawhtannia inkahna a thlen hnuah hian ‘ngaihven ngai’ tiin an sawi a; mahse, man a nih hnuah chuan a mawhphurtu ber nia an ngaih thu an sawi zui a ni.
Silai hmet puaktu hian Chicago khawpui bul lawka parade hi an ram sanaa Thawhtanni chawhma dar 10:15 (India-a zan dar 8:45) velah a kap a, hei hi an parade tan atanga reilo te a ni.
Parade-naah hian Independence Day lawm nan float, marching band leh vantlang intihhlimna eng eng emaw tih tura ruahman a ni.
Kum khat chhunga an hlim ber ni ni thin chu hun reilo teah chiainain a tlakbuai zui a. A entute hian pushchair, purse leh lawn chair te chu khawlaiah an tlansan remrum a. Mi thenkhat chuan silai puak hi a tirah chuan hal puah ri emaw an ti niin an sawi.
Silai hmet puaktu hian vantlang awm khawmna bul lawka dawr chung atangin a kap a, police-in a kahna hmunah hian ‘finfiahna’ pawh an hmu tawh tih an sawi.
A hmunah hian puitling panga an thi nghal a, mi dang pakhat hi entu zinga mi, a bul damdawi ina lak hnua thi a ni a. Mi 20 chuangin hliam an tuar bawk.
Crimo-a lakah hian eng thubuai leh puhna mah la siam a ni lo va, hetianga a tih chhan pawh hriat a la ni lo.
Social media firm-te chuan Crimo-a account-te an titawp nghal a. A account-ah hian rap video eng eng emaw a dah bakah inkahna, silai chelekna leh tharum thawhna lam ang chi thil a dah nasa hle.
Thlalak a dah pakhatah chuan Donald Trump-a flag a vai lai te, thlawhna tumhmuna Trump-a chuanna lirthei chibai a buk lai pawh a lang.
Highland Park-a inkahna hi Uvalde, Texas leh Buffalo, New York-a inpawngkahna rapthlak tak tak a thlen hnu thla khat leka thleng a ni.