Aizawl : India rama district 272-a ruihhlo do beihpui kalpui mek ‘Nisha Mukt Bharat campaign’ Kolasib district-a kalpui dan tur ngaihtuahin nimin khan Kolasib Bawrhsap John LT Sanga hovin a kaihhnawih mipawimawh te Kolasib-ah an thukhawm a. Zirna in leh kohhran inkhawm kaltlanga ruihhlo do beihpui chu kalpui ni se, an ti.
Ruihhlo bawiha tang mek te chhanchhuah bakah ruihhlo laka la fihlim te venhimna lam pawh uar zawka zirtir tha an ti a. Sorkar department hrang hrang, NGO, khawtlang leh kohhran hruaitute thawhhona hnuaia Kolasib district-a school leh Sunday school-ah te ruihhlo hman sualna laka fihlim tura zirtirna kalpui tura ruahmanna siam an rel a ni.
Jordan Centre Superintendent Lalnunmawii'n a sawi danin, kumin April thleng khan ‘Nisha Mukt Bharat campaign’ hnuaiah Kawnpui, Thingdawl leh Kolasib-a High school leh Higher secondary school thenkhatah ‘Drugs free campaign’ buatsaih a ni a. Class 6 atanga Class 12 zirlaite tan heng hun hi buatsaih a ni tlangpui.
Agape Moral Reformation Organisation (AMRO) thawktute pawhin, Lungdai, Kawnpui, Hortoki, Sethawn, Thingdawl, Kolasib leh Bairabi-a ruihhlo vanga tanpuingai inziaklut 704 an enkawl mek thu an sawi a. National exhilaration union society (NE- XUS)-in Vairengte, Bilkhawthlir, N. Chhimluang, Saiphai leh Saipum khua ah te ruihhlongai mi 405 an enkawl mek bawk.