Uddhav Thackeray-a kaihhruai Shiv Sena chuan tun hnaia Maharashtra assembly-a a tlem zawk an nihna fiah a nih hnuah an MP-te hel leh an hlauh avangin Lok Sabha-a an chief whip an ruat thar.
An hruaitu hlun, Sanjay Raut chuan Nilaini khan Lok Sabha speaker hnenah lehkha thehlutin Rajan Vichare chu chief whip atan ruat thar a ni tih a thlen a, Bhawna Gawli a thlak.
Lok Sabha-a member 19 leh Rajya Sabha MP pathum nei party-ah hian an MP-te zingah party chhunga helna chhuak thei anga sawina a darh chak hle.
Thla hmasa khan Eknath Shinde-a chu helin Thackeray-a hian an state assembly-a MLA 55 a neih zinga 40 zet chu chânin rorelna a chelh pawh a tawp phah.
Kar hmasa khan chief minister atangin a bâng a. A tukah Shinde-a lamtangte hian BJP nen sorkar siamin Thawhtanni khan assembly-ah an chak tawk tih an finfiah zui bawk.
Sorkar buknaah hian Shinde-a lamtangte hian member 288 awmna rorelna inah vote 164 an hmu a, sorkar tura MLA 144 neih ngai chu an khum a. MLA 99 chiahin an thlawp lo va, a hma ni, Pathiannia speaker thlannaah duh lo lam 107 awm atangin a tlahniam leh hman a ni.
Tang dun thar pahnih hian Maharashtra Assembly-ah hian speaker leh chief whip pawh an ruat thar a. Sorkar bukna vote thlak laia whip an palzawm avangin Thackeray-a lamtang MLA-te chu an nihna paihsak turin an thlen zui bawk.
Shinde-a hian a lamtangte nen chuan Sena dik tak zawk an nih thu sawiin MLA an neih zinga hmun thuma thena hmun hnih an ni a. Supreme Court-a a thlen tum pawhin Thackeray-a chu ‘beiseina nei lo tlem zawkte’ hruaitu, thuneihna chuh ve si niin a sawi.
An party inthen chungchanga thu titlu thei awmchhun, Election Commission hnenah Thackeray-a lam hian an party hming leh nihna chu chhawm zui an dil.
Thackeray-a hi a MLA tam zawkin helsan mah se mipui tam takin a lam an la tang niin a ngai.