Mizoramah boxing inelna lian buatsaih a ni leh dawn a, tun tuma inelna erawh a kalphung a dang deuh dawn.
Rihna huang hrang pangaah a duh apiang tel theihna tur LPS Professional Fight buatsaih a ni dawn a, August 31, 2022-ah tan a ni ang.
Kum thum kalta kha LPS Promotional Fight hnuhnung ber neih a ni a, hemi hnu hian Mizo boxer-ten boxing an khelhna huang zauhin professional kawng an zawh chhunzawm nasa hle.
Kum 2009 atanga 2019 chhunga LPS Promotional Fight vawi riat buatsaih tawh kha tidanglamin professional dan hnuaiah an inhnek tawh dawn a, huam zau zawka talent hai chhuah leh professional boxing khel tawhten hnuhma tha an neih belh theih nan LPS Professional Fight tiin a hming an thlak.Chiang zawkin
Pro Fight tharah hian Mizo boxer-te tel tamna weight panga - flyweight (kg 48-52), bantamweight (kg 52-55.3), featherweight (kg 55.3-59), lightweight (kg 59-63.5) leh welterweight (kg 63.5-70) huangah title an inchuh dawn.
A hluiah weight panga tho awm mahse middleweight leh light heavyweight tel zui lovin featherweight leh welterweight dah a ni ve thung.
Weight tin a champion-in lawmman pawisa fai Rs 50,000 dawngin pahnihnain Rs 20,000, semifinal-a tlain Rs 10,000 leh quarterfinal-a tla hnenah Rs 5,000 theuh pek a ni dawn a, a vaiin weight hrang pangaah lawmman pawisa fai Rs 5,50,000 sem chhuah a ni ang.
Weight tinah semi-final atangin inhnek zawng zawng khawvel puma professional boxing record chhinchhiahna Boxrec-ah ziah luh vek tur a ni a; Pro Fight champion hian Boxrec record-ah chak vawi hnih a nei thei dawn a, a kal zelna tura hnuhma hlu leh pawimawh tak a ni ang.
Weight tin a champion-ten WBC India title an chuh zui theihna kawng dap a ni dawn bawk a, Pro Fight buatsaihtute chuan thil harsat lo leh tih theih mai tur niin an sawi.
Mizoram mai ni lovin state dang atang pawhin mahni senso a tel duh tan kawng hawn vek a ni a. Professional boxing khel tawh leh mi thar, amatuer chauh la khelte pawh a huam vek a, chutihrualin fixture siam hunah tawn hriat nei leh mi thar erawh thliar an ni ang.