Macau-a an khualbuk lian ber zinga mi, Grand Lisboa-a thleng zingah Thawhlehni khan COVID-19 kai mi eng emaw zat hmuh chhuah a nih avangin thuneituten an khar nghal a, khawvel khawpui zinga pawisa khelhna (gambling hub) lian berah hian hri hi a darh chak hle bawk.
Khualbuk bakah hian building dang 16 zet pawh Chinese-in a bik taka a awp khawpuiah hian kharkhip nghal a ni bawk a, tumah luh leh chhuah phal a ni lo.
Hripui a len tan tirh atanga hri a darh nasat ber an tawn mekah hian thuneitute chuan mi 13,000 chuang an khung hrang mek a. Macau-ah hian June thla laihawl atang khan coronavirus kai mi 900 chuang an awm tawh a, October, 2021 atang khan hripui lakah hian zalen angin an awm tawh a ni.
Grand Lisboa hi tun hnaia casino hotel kharkhip pahnihna a ni ta a. SJM Holdings ta hi Macau kingpin thin, Stanley Ho-a din niin khawpui chhinchhiahna pakhat, hriat hlawh ber pawl a ni.
Tual chhung chanchinbute chuan khualbuk khar leh a pawna invenna hmanrua leh hazmat suit nena an ding thlalakte an thehdarh a. Grand Lisboa erawh chuan khar an nih chungchang hi engmah an la sawi lo.
Portuguese-ho hnuaia awm thin khawpuiah hian a hma lama Shanghai leh khawpui danga sorkarin inkharkhip hmak a kalpui ang chu a kalpui dawn lo va. Hmun tam zawk erawh khar a ni ang a, thingpui dawrah pawh chawlh phal lovin ei tur an pek chhuah chauh phal a ni ang.
Mi chengte chu ina tawm tura tih an ni a, tun kar chhungin khawpui pum hi thawh thumin hri an kai leh kai loh endik an ni dawn a. A kar lakah rapid antigen test ti tura tih an ni bawk.
Macau-ah hian an casino-te chauh inhawn phal an ni a. Pawisa khelhna hmun hi khawpuiin sum a lak luh 80% zet an hmuhna a ni a, a mi cheng tam zawk hi heng hmuna hnathawk an ni bawk.
Casino-te hi hawng dawn mah se a tlem thei ang thawktu leh inkhelte luh phal an ni a, thawktu tam zawk chu sorkarin ina awm turin a ti a ni.
Macau hi China-in ‘COVID awm lohna’ tih ruahmanna a kalpui zawmtu niin an pawisa hloh tam dawn hle mah se inkhar an ngai a ni.Ram dangte tan inhawng tan
Macau khawpui lama an buai leh mek laiin China chuan ram dang nena thlawhna hmanga inkalpawhna kum hnih zet a lo awltir tawh chu a chhunzawm leh dawn a.
China-a lut turte erawh chuan dan zam khauh tak an zawm erawh a la ngai dawn a. An luh atanga ni sarih chhung chu inkhung hranna hmun tura ruahman khualbukah ni sarih an inkhung hrang phawt ang a, an zawh hnuah ni thum dang an chenna inah an awm hrang leh dawn bawk a ni tih sorkar chanchinbu chuan Thawhlehni khan a puang.
Ruahmanna la khauh tho mah se thlawhna hmanga inkalpawhna hawn leh hian thlawhna a tipung ngei dawn niin an ngai a, a bikin United States atanga lut an tam ngei a rinawm niin sorkar enkawl Global Times chuan a tar lang a. An ram chu khawvel dang lakah a inhawng hret hret zel tih a tar lang bawk.
Hripui a len atang khan China hi insiam rem rang leh nasa ber a ni a. An rama lut turte chu ram 125 zeta a embassy leh consulate-ah inhriattir hmasa zel turin an ti.
An inhawn thar leh tak avang hian tun kar tir lamah pawh passenger 2,025 chu an lut nghal dawn tih sawi a ni bawk.
India atangin a luh theih dawn em tih erawh a la chiang lo va, an rama hnathawka awm Indian leh an chhungte visa chu a tihtawp (ban) vek hnu kum hnih, thla hmasa khan a khapna hi a hlip a; mahse, hemi hnuah pawh hian India nena intlawhpawhna lam sawi rik a la awm lo.