Wimbledon mipa champion lai Novak Djokovic chuan semi-final a thleng zo lo teuh a. Mahse Jannik Sinner lakah set hnih a hloh hnuah insiamrem leh theiin set nga inkhelah hnehna a chang a, semi-final a lut.
Centre Court a Thawhlehni zana inkhelah Djokovic hian a khingpui kum 20 mi hi 5-7 2-6 6-3 6-2 6-2 in a hneh a. A zawna vawi li nan SW19 ah champion a tum mek a, a hlawhtling a nih chuan Wimbledon-ah vawi 7 a champion ang.
“Set hmasa pahnih chhung khan player tha zawk a ni a, kan chawlh laia inthiarna hun ka neih khan ka rilru ka ti fim a, mahni leh mahni infuih chawpin kha kha ka insiamthat theih chhan a ni.” tiin a chak hnuah a sawi.
Hmeichhe lamah kum 2019 champion Simona Halep chuan tunhnaia a chetthat chhunzawmin Amanda Anisimova chu awlsam takin a hneh a, semi-final a lut.
Kum 30 mi hian darkar khat leh minute thum chhungin 6-2 6-4 in a hneh a, Elena Rybakina a hmachhawn leh ang.