Indigenous People’s Regional Alliance (TIPRA) Chairman Pradyot Debbarma chuan an party-in an tum ber chu ‘Tipraland’ din a nih thu sawi nawn lehin an party thawhpui tur tupawhin an tum ang hi an neih ve a ngaih thu a sawi.
Debbarma chuan political party zingah TIPRA nena thawhho duh an awm thin thu a sawi a, a hmasa berah chuan an party-in ‘Tipraland’ an phut chu an pawmpui a ngaih phawt thu a sawi.
“Kan duh ber chu ‘Greater Tipraland’ a ni a. Political party tupawh, TIPRA thawhpui duh chuan ziakin kan dinna hi an thlawp a ni tih an tilang hmasa phawt tur a ni,” tiin TIPRA chairman hian a sawi.
“Tawngkaa sawi ringawt chu a tawk lo va, ka Tiprasa-puite hi dawt ka tihpui thei lo. Tute hnen atang mahin ziaka kan thil phut min thlawptu ka la dawng lo va, ka dinna atanga insawn erawh ka la tum lo,” a ti.
“Inbiak kan inpeih reng a, BJP, TMC leh CPI-M pawh ni rawh se, kan thil phut hi an duh ve a ni tih chiang takin rawn sawi zel rawh se,” tiin Debbarma hian thuthar lakhawmtute a kawmnaah a sawi.
Debbarma-an hetiang a sawi hma lawk hian TMC hruaitu hlun, Kunal Ghosh chuan Ningani khan TIPRA chairman hi kawmin Tripura-a politics inlumlet vel a sawipui.
“Kunal Ghosh hi ka hriatna a rei tawh a, Tripura-a kan tun lai politics ka sawipui,” tiin Debbarma chuan a sawi a. Thawhho lam erawh an sawi lo tih a sawi.
TIPRA hian Greater Tipraland phut chhuak tur hian Tripura Tribal Areas Autonomous District Council (TTAADC)-ah sorkarna an chelh mek.
Hetih lai hian TMC chu BJP rorelna state-ah hian eptu chak tak an nei mek a. TIPRA hi tribal chen tamnaah chuan IPFT tan hlauhawm erawh an tling pha mek.