Vijay Kumar, Inspector General of Police (IGP), Kashmir chuan darkar 24 liam ta chhung khan firfiak pawlte laka beihpui thlaknaah hel pawla tel mi panga tihhlum an nih thu a puang.
Venhim hna thawktuten hmun hrang hranga beihpui an thlaka thi zingah hian Lashkar-e-Taiba-a tel mi pahnih bakah Hizbul Mujahideen commander pakhat a tel.
Kashmir Zone Police-te chuan Kashmir-ah hel pawla tel mi panga chu darkar 24 chhung khan thah an ni a. Police leh venhim hna thawktute chu chhiatna lian tham thleng lova an hmalaknaah an chhuang hle tiin twitter-ah an tar lang.
An tihhlum mi panga zinga pahnih hi Jammu & Kashmir huam chhunga Pulwama-a Puchal vengah Nilaini zan leh Ningani khan an kap hlum.
Hemi hma hian hel pawla tel mi pakhat (an vaiin mi pahnih) thah a ni tawh a. Mi dang zawn hna kalpui mek a ni bawk tih KZP hian an sawi bawk.
Kulgam-a Zodar vengah Kulgam police leh 1RR tangdun chuan beihpui thlakin LeT a tel mi pahnih an kap hlum.
Nilaini khan venhim hna thawktute chuan Hizbul Mujahideen commander Mehrazuddin Halwai chu an intawhchilhnaah an kap hlum bawk a. Kashmir IGP Vijay Kumar chuan an kah hlum tak hian hel pawla tel tur mi a sawm luh thin bakah an pawl tana sum leh pai khawntu ber a nih thu a sawi.
Ubaid-a tia hming dang nei, Halwai-a hi firfiaka chetna hrang hrangah a inhnamhnawih tawh thin a, civil mite pawh alo that tawh thin.
“Mehrazuddin Halwai hi hel pawlah rei tak lo tal tawh thin niin civil, khaw hotu, police leh sipai-te thihna tam takah a inhnamhnawih a. IED leh granade tihpuahnaah a inhnamhnawih nasa hle bawk a. An pawla tel tur mi sawm luh kawngah leh an pawl tana pawisa khawntu ber a ni,” tiin IGP hian a sawi bawk.