Hachhek Bial Kuhva Chingtu Pawl (HBKCP), Taitesena Group leh Langkaih Group YMA leh Hachhek Joint VC ten nimin zing dar 2:30 vel khan Zamuang khaw daiah dan lova kuhva tawlh bag 300 an man a. Nimin zing lama man sate hi nimin vek chhun lamah khan mi tu tih hriat lohten an hal.
Nimina kuhva man sa hal takte hi motor MZ-01 V/5972 leh MZ-01V/5750 hmanga phurh, Chuauliansawti, Kanhmun ta nia hriat, Vairengte kudam atanga Kanhmun kudama dah tur a nih thu thudawnna chuan a sawi.
HBKCP, YMA leh VC ten Zamuang khaw daiah zing darh 2:30-ah an man tih a sawi bawk.
HBKCP, YMA leh VC te chuan foreign kuhvain dan lova Hachhek bial a lut thin chu an duh loh thu vawi tam tak Mizoram sorkarah pawh an thlen tawh tih an sawi a. Dan lova foreign kuhvain Mizoram a lut thin chu an duh loh thu leh an do tlat thu sawiin, “Foreign kuhva hian Hachhek bial hi rawn lut tawh lo se kan duh a ni,” an ti.
Tun hnuah foreign kuhva phurin Hachhek bial an lut leh a nih chuan eng harsatna pawh tawk se an cho chhuaha an ngaih tawh tur thu an sawi bawk a ni.