Mizoram Super League season 7 Play In match 3 khel turin Mission Veng Hotshots an tling a. Nizan khan Khatla TBL nen an inkhel lehnghal.
Mission Veng Hotshots hian 92-83 in Tuikual South Basketball Club an hneh a. League khelh zawh taka a sang zawk an nih chu an chakpui a, final luh inchuh turin an tling.
Tun season Mizoram Super League-ah post season hi Play In Tournament a kalpui a ni a. League a sang ber leh a dawttu Play In-ah hian an inkhel a, pathumna leh palina an inkhel ve leh bawk.
Heng inkhel pahnih a league a hniam zawkte hi round dawtleh tling turin vawi hnih an chak a ngai a. Pakhatna leh pahnihna inkhelah champion lai Zarkawt BCA an chak avangin final an lut. Pahnihna Khatla TBL in pathumna leh palina inkhel a chak zawk an lo hmuak.
Pathumna leh palina inkhelah palina Tuikual South an chak hmasa zawka, an inkhelh nawn lehnaah Mission Veng Hotshots an chak ve zui avangin pathumna team hi an tling zawk.
Nizan inkhelah Khatla TBL an chak chuan an tling anga, Mission Veng Hotshots in vawi hnih chak an mamawh ang.
Nilaini zana inkhel pawimawhah Tuikual South BC an khel chhe lo leh a, nimahsela game 1 a an tih theih an ti hlawhtling nawn thei lova. Hotshots foreigner Joshua Aaron Keyes chu an veng nawn zo lo.
Keyes hian point 38 leh rebound 17 bakah assist vawi 7 a nei a. Samson Lalchhuanawma leh Zonunsanga ten point 20 leh 18 in an thlawp bawk a. Offense-ah an pathumin an pawimawh.
TKS tan Lalnunpuia chuan point 29 leh rebound vawi ruk a nei a. An foreign player Darrell Bowie chuan point 27 leh rebound 13 la bawkin Dennis Lalmuanpuia’n point 15 leh rebound vawi 9 la mahse an tan tlin nan a tawk zo lo.