Aizawl: Aizawl khawpui huam chhungah tun hnai ruah sur avangin hmun eng emaw zatah lei a min a, mihring nunna chân erawh an awm lo.
Aizawl DC hnuaia Disaster Management & Rehabilitation (DM&R) Branch atanga thu dawn danin tun chawlhkar tir Thawhtanni leh Thawhlehnia ruah sur avangin Aizawl khawpui chhung hmun 11-ah lei min awmin, hmun eng emaw zatah lei min lian tham tia sawi tling tawk lo a tenau eng emaw zat a awm bawk.
June 27 atanga July 3, 2022 inkar khan hmun 14-ah lei min thu Aizawl DC DM&R branch hian an dawng a. Hemi hun chhung vek hian lei minin a tihchhiat in luah lai pathum a awm a; lei min avang hian veng pakhatah chhungkaw pathum luah lai in lei thiah a ni a. Hei bakah lei tawlhin lirthei tihchhiat a nei bawk a ni.
Aizawl DC hnuaia DM&R Branch-a thawktute hian chhiatna a thlenin a tul dan azirin PWD, P&E nen thawk hoa hma an lak thin thu an sawi a. Ruah sur nasa avanga lei khi awmte pawh Geology & Mining dept nen enho thin a nih thu te, lei min zel tur venna atan silpoulin-te pek chhuah a nih thin thu te, a tul dan a zirin Quick Response Team pawh chhiatna thlenna hmunah tirh thin an nih thu an sawi.
Tun dinhmunah Aizawl Municipal Corporation area hi zonal officer pakhat leh BDO paliten an vil mek a ni.