Vansang boruaka thlawk kual vel thin, skydiver-te chuan thlawhna chu Sweden-ah tlain a chuangin mi pakuate an thi vek niin police-ten an sawi.
Thlawhnaah hian skydiver pariat leh a khalhtu an chuang a, Stockholm khawpui atanga khawthlang lam km 160 chuanga hla, Orebro thlawhna tumhmun tlankawng bul lawkah a Ningani khan a tla.
A chetsualna hi a thlawh chhuah hnu lawka thleng a nih a rinawm.
“Chetsualna pawi tak a ni a, a chuang zawng zawngte an thi vek a ni,” tiin Swedish police hian an website-ah an tar lang.
Thlawhna hi a tê chi, DHC-2 Beaver a ni a, tual chhunga skydiving club-ten nipui chhung atana an hman (hire) niin tual chhung chanchinbute chuan an tar lang.
Prime Minister Stefan Lofven chuan chhiat tawk chhungte a tawrhpui thu a sawi a. “Orebro-a thlawhna tla ka lo hria chu a lungchhiatthlakin a pawi a, mi a barakhaih tak zet a ni,” tiin Twitter-ah a tar lang a. “An hun harsa takah hian a tuartu te, an chhungte leh an laina hnaite ka rilruah an awm reng a ni,” a ti bawk.
Kum 2019 pawh khan Sweden-ah tho hian hmar lamah, parachute hmanga thlawhna atanga zuan chhuah tumte phurtu thlawhna chu a thlawh chhuah hnu lawkah tlain mi pakua an lo thi tawh a. An chhui zuinaah chuan thlawhna hi inpeih fel tawk lo deuhvin a thlawk chhuak niin an hria.