NDA presidential candidate Murmu-i’n Aizawla campaign a neihah hian ZLP Leader Lalduhoma chu tel vea thusawi tur angin thang mah se a hote nen an tel lo a, a hming lanna programme sheet chu thehdarh luih a nih thu a sawi.
The Zozam Times zawhna chhangin ZLP leader chuan NDA presidential candidate-in Aizawla campaign a neih tur thu an hriat loh thu leh a campaign-na hmuna thusawi tura ziahna programme sheet chu amah rawn loa siam a ni tih sawiin, “Programme sheet hi ka hmuh hnuah siam tha turin ka hrilh nghal,” a ti.
Duhoma chuan, “Presidential candidate-in campaign a neihnaah hian central-a BJP hruaituten ‘opposition leader lo telh ve hram teh u’ an tih angin programme an lo duang a, tah chuan min rawn si loin thusawi tura tih kan lo ni,” tiin a sawi.
A sawi zel danin BJP Mizoram state vice president-in function an buatsaiha a telh theih leh theih loh whatsapp kaltlanga a sawm thu leh tah chuan programme sheet chu a pe tel tih sawiin, “Kan tel vena chi a ni lo tih leh kan kal lo tur thu bakah ka hming chu delete turin ka hrilh nghal a, an siam tha leha min telh ta lo,” a ti.
NDA presidential candidate campaign programme chu BJP Mizoram Pradesh hotute thenkhat, Minister of State Lalruatkima leh protocol officer te duan a nih thu sawiin, “Kha programme duangtu mi tlem te zinga mi khan programme siam that hmaa ka hming lanna kha an vawrh darh lui ta hram a ni,” tiin a sawi.
Duhoma chuan India president thlanna neih turah hian vote an pek tur an thlang fel tawh tih a sawi a, hetihlai hian NDA candidate Murmu-i nge eptu pawl hrang hrang joint candidate, Trinamool Congress hruaitu Yashwant Sinha an thlang zawk dawn tih erawh an la sawi theih loh thuin The Zozam Times a chhang.
ZLP member-ah hian ZPM MLA Lalduhawma bakah ZPM-in a thlawp independent MLA mi panga - Vanlalhlana, Dr Vanlalthlana, C Lalsawivunga, VL Zaithanzama leh Lalchhuanthanga te an tel a ni.