Aizawl: Lungleia School Education Complex leh MBSE Regional Office thar chu nimin khan Chief Minister Zoramthanga’n a hawng a, sorkarin education pawimawhzia a hriat belh zel avangin sum tam tak sengin education department hmun pawimawhte sak a nih thu a sawi.
Education department hmun pawimawh pahnih a ruala hawnna inkhawm, Education Conference Hall-a neihah hian chief minister chuan hmun pahnih an hawn taka hma lo la hmasatute chungah lawmthu a sawi a, “Sum tam tak senga hmun ropui tak sak a ni leh zirtirtu leh thawktu rawih a ni hi sorkarin education pawimawhzia a hriat belh zel vang a ni,” a ti.
Zorama chuan mi zawng zawngin an um a, an buaipui tlan theih ber chu zirna a nih thu sawiin, zirna chu mihringte timihringtu leh mi pangngaia siama eizawnna siamsaktu a nih thu a sawi.
Pathianin a tawk têin, a hun zelah mihring mamawh a pe thin tih chief minister chuan sawiin, “Pathian ropuizia kan hriat theih nan leh hma kan sawn a, amah kan chawimawi nan Pathianin zirna min pe a ni,” a ti bawk.
He huna khualzahawm, Education Minister Lalchhandama Ralte chuan sorkar hmun pawimawh leh ropui tak hawn a ni ta hian sorkarin education a ngaih pawimawhzia a tilang tih a sawi a, sorkar department zinga Covid-19 tuar nasa berte zinga mi an nih avangin sikul naupang chauh ni loin zirtirtu, nu leh pa, tlawmngai pawl leh mipuite zirna kawnga hma an sawn zel theih nan theihtawp chhuah a tul tih a sawi.
Education department hmun pawimawh hawnna hun hi Education Secretary Lalzirmawia Chhangte-in a kaihruai a, Lok Sabha MP C. Lalrosanga pawh he hunah hian telin, MBSE Chairman JH Zoremthanga’n thu a sawi a, Education Director Dr. H. Lalthlangliana’n technical report a pe a ni.
Lunglei School Education Complex leh MBSE Regional Office Building te hi Ministry of Development of North Eastern Region (DoNER) hnuaia Non-lapsable Central Pool of Resources (NLCPR) kaltlanga sak a ni a, Education Complex hi Rs nuai 800 senga sak niin chhawng sarih a ni a; MBSE Regional Office hi cheng nuai 240 senga sak niin chhawng li a ni.