India rama coronavirus leng darh thar leh mek chuan ziaawm lam a la pan thei lo va, darkar 24 liam ta chhung khan mi 18,815-in an kai tih hmuh chhuah leh hman a ni.
Hri kai hmuh tharte nen hian India-a a kai hi mi 4,35,85,554 an ni ta a. Tun kar chhungin mi 83,000 chuangin an kai tih hmuh chhuah leh hman tawh a ni.
Chhim lama Kerala-ah chuan mi 3,300 chuang hri kai hmuh thar an ni a, West Bengal-ah mi 2,880 chuang hmuh chhuah an ni bawk a. Chhim lam state tho, Nadu-ah mi 2,765 leh Maharashtra-ah mi 2,678 hmuh an ni bawk a, an khawpui, Mumbai bikah mi 540-in an kai bawk.
Ram khawpui ber, Delhi-ah chuan mi 579-in an kai tih hmuh niin Gujarat-ah mi 717 leh Madhya Pradesh-ah mi 140-in an kai bawk.
Tun hnai ni eng emaw zat chhung chu hri kai enkawl lai pawh a pung zawngin a kal leh tawh a. Darkar 24 liam ta chhungin mi 2,878 laia pung lehin enkawl lai hi mi 1,22,335 an awm mek tih union health ministry chuan a tar lang a. A kai hmuh tawh zawng zawng atanga chhutin enkawl lai hi 0.28% an ni mek.
Darkar 24 liam ta chhung hian mi 38-in an thihpui leh hman bawk a, mi 5,25,343-in an thihpui tawh tih health ministry chuan a tar lang.
Thi zinga 16 hi Kerala-a mite an ni a; Maharashtra-ah pariat; Punjab, Uttar Pradesh leh West Bengal-ah mi pahnih theuh an thi bawk.
Assam, Bihar, Chhattisgarh, Delhi, Haryana, Meghalaya, Rajasthan leh Tamil Nadu-ah mi pakhat theuh hripui vanga thi an awm bawk.
Darkar 24 liam ta chhunga sample endik zinga 4.96% chuan hri an kai tih hmuh a ni a, chawlhkar khat liam ta chhunga endik zinga 4.09%-in an kai bawk.