Aizawl: MNF President Zoramthanga chuan Inrinni khan Lungleia an party office, Mizo Hnam Rûnah chhung inkhawm hmanpuiin thu a sawi a, kum 2023 inthlanpui lo awm turah Congress party hian MLA panga vel bak an neih a rinawm lo va, ZPM pawhin under 10 an pel a rinawm lo tih chu mi thil chik mite hmuh dan a nih thu a sawi.
Zorama chuan ram hruai hna thawk tur hian mi nghet leh rinawm lo chu Pathian hian a ruat lo vang tih sawiin, “Mahni pawl din pawh chhuahsan leh zel thin, reilo te chhunga mahni rawng thlak fo thin mi, tui anga nghet lo chief minister hnuaiah kan ram hi a awm lo vang tih hi i hre bawk ang u,” a ti.
An party chu beiseina leh hmathlir nei thui, a êng zawnga thlir thin an ni tih MNF president chuan sawiin, a din tirh ata kalphung thlak ve hauh loa ‘Pathian leh kan ram tan’ tih kalpui ngar ngartu an nih thu a sawi a; an khingpuiten sawiselna tur an hriat loh thu leh an hnathawh leh thiltih vangin an chil a put mek thu a sawi.
Zorama chuan Lungleia MZU Southern Campus panna kawng siamna tur leh tui lakna tur buaipui nan sum dah a nih thu a puang bawk.
Thusawitu dang, MNF adviser, Education Minister Lalchhandama Ralte chuan chief minister chu ram leh hnam dinchhuah theihna tura education pawimawhna hre mi a ni tih sawiin, “Education department hi priority a pe nasa a, zirtirtu indaih lohna phuhruk nan tun term-ah hian zirtirtu 2,500 chuang lak a ni tawh,” a ti.
Zirtirtu an lakte chu Hindi teacher 806, SEDP teacher 767 a nih thu sawiin, chungho chu fair lo taka lak an ni lo tih sawi thawm an hriat loh thu leh an tling lo chung chung an la ngai lo tih a sawi bawk a ni.