Ngaihven leh duat ngai Tlawng lui
AMC, Central YMA leh Save Mizoram River (SMR) hruaitute chuan kartawp mai khan Tlawng tui tibawlhhlawhtu leivung paihna hmunte an tlawh a, an hmalak chhoh zelna turah pawh theihtawp chhuah zel se a tha hle.
Tlawng lui hi kan tui tlan hnar a ni a, a thianghlim a ngai hle chung hian kan duat lo hle a, leivung leh bawlhhlawh Tlawng luia luanglut mai thei tura paih kan la ching hle te hi a zia lovin, hmasawnna kan la ngai nasa viau mai.
AMC hotute leh pawl pahnih hruaitute hian Tuikual lui tlawhin, Ebenezer Hospital bul hnai bakah hmun dang atanga bawlhhlawh leh leivung an paihna thinte chu a theih chin chin hung tura hmalak an rel a, Tuithum lui bul hnaia AMC in leivung paih phalna a lo pek tawh leh an paih mekna hmunte chu a bul hnai maia lui luang a tihbawlhhlawh bakah Tlawng lui fintu a nih avangin a hmunah hian municipal commissioner chuan stay order a pe nghal bawk a ni. Hei bakah hian hmun dang dang an tlawhnaah pawh duhthusam lo deuh lai an hmu bawk a, hmalak zel atan a tha hle.
A tlawh china an chet ang rap rap hian hmun dang zelah pawh chet deuh rap rap ngam a hun tawh viau mai a, tuna tlawh bak hmun dang dang pawh hi tlawh zel thei se la, kan tui tlan ber Tlawng lui a thianghlim zel theih nan theihtawp chhuahin, mipuiah pawh zirtirna nasa zawk pe sauh sauh bawk teh se.